Jo vetëm merkatoja e janarit dhe kërkimi për një qendërmbrojtës e ndoshta një lojtar krahu, Milani mendon tashmë edhe për merkaton e ardhshme verore dhe sipas asaj që raportojnë mediat spanjolle do të ishte duke ëndërruar madh, duke nisur kontaktet për polakun Robert Lewandowski. Sipas të përditshmes Sport në fakt, do të kishin pasur kontakte mes agjentit të yllit polak, Pini Zahavi, dhe drejtorit sportiv të kuqezinjve, Igli Tare, i cili do të kishte kërkuar informacione për të kuptuar situatën mbi të ardhmen e qendërsulmuesit dhe gatishmërinë e tij për të konsideruar një transferim në Itali.
Tare ëndërron një tjetër goditje me parametër zero në stilin Modric, sepse kontrata e sulmuesit të Barcelonës, 37 vjeç, skadon më 30 qershorin e ardhshëm dhe edhe pse ish-lojtari i Bayern do të ishte i lumtur ta mbyllte karrierën në Camp Nou, gjithçka për momentin lë të mendohet se rrugët mes Lewandowski e blaugranave do të ndahen dhe pra nga janari ai do të ishte i lirë të bënte marrëveshje me një klub tjetër.
Lexo më tej: Robert Lewandowski ka vendosur: nuk do të rinovojë me Barcelonën në fund të sezonit
Klub që Tare do të dëshironte të ishte Milani, ku për më tepër fanella me numrin 9 është ende në pritje të një pronari. Edhe pse tratativa është në një fazë embrionale (dhe shumë e ndërlikuar nga pikëpamja ekonomike duke qenë se në Spanjë polaku fiton 33 milionë në vit), një kontakt i thjeshtë për të kërkuar informacione është hapi i parë për ta kthyer një ëndërr merkatoje në një realitet konkret dhe Milani dëshiron të jetë gati të shfrytëzojë rastin nëse do të paraqitej.
Në gjurmët e polakut Lewandowski do të kishte disa klube arabe të gatshme edhe të dyfishonin pagën e tij aktuale, por Milani është hedhur përpara si një opsion konkret nëse polaku do të vendoste të qëndronte në Europë dhe të vazhdonte të konkurronte në nivelet më të larta. Massimiliano Allegri, i cili gjithmonë ka kërkuar kampionë me eksperiencë të madhe, nuk do të mund ta priste ndryshe veçse me krahë hapur: në fund të fundit mosha është vetëm një numër dhe Modric është dëshmia e gjallë.
