Jamie Carragher nuk i ka kursyer fjalët për të kritikuar Liverpool-in e Arne Slot, që doli nga ndeshja me disfatën e dytë radhazi: pas humbjes në Premier League kundër Crystal Palace, Reds u rrëzuan 1-0 në Stamboll ndaj Galatasaray-t, të ndëshkuar nga një penallti e Victor Osimhen.
Për ish-mbrojtësin dhe tashmë opinionistin, Liverpool “nuk është një skuadër e nivelit të lartë”, por “një kaos total”, dhe akuzon Slot për humbjen e ekuilibrit që i kishte bërë Reds të fortë sezonin e kaluar. “Sot Liverpool nuk po luan futboll, por basketboll. Shkohet nga njëra anë e fushës te tjetra pa kontroll: një skuadër e madhe nuk mund ta lejojë këtë gjë”, ka thënë Carragher për CBS Sports.
Carragher: “Nuk është çështje rezultatesh, por se si luhet”
Carragher ka vënë në shënjestër edhe Florian Wirtz, i ardhur këtë verë për mbi 100 milionë sterlina: “Nuk është në formë, duket jashtë kontekstit. Është i ri dhe do të ketë kohë të rritet, por për momentin duhet lënë jashtë: Liverpool duhet të rifitojë siguri dhe të kthehet te kompaktësia e vitit të kaluar. Në këtë moment është një katastrofë”.
Megjithëse pati një fillim sezoni perfekt, me shtatë fitore radhazi mes kampionatit dhe kupave, Liverpool ka nisur të tregojë krisje shqetësuese. Humbja në fushën e Crystal Palace dhe ajo në Champions kundër Galatasaray kanë vënë në qendër të vëmendjes problemet e skuadrës së Arne Slot, ende e para në shifra, por jo në paraqitje.
Ish-flamuri i Liverpool ka nënvizuar se sinjalet e alarmit ishin të dukshme që në ndeshjet e fituara: “Nuk është çështje rezultatesh, por mënyre loje. Shenjat dukeshin që në fillim — Liverpool rrezikoi shumë edhe kundër Newcastle, që ishte me dhjetë lojtarë. Dhe kundër Palace lejoi shumë raste, më shumë se çdo skuadër tjetër në Premier”.
Sipas ish-mbrojtësit, rënia ishte e parashikueshme dhe tani i takon trajnerit të përmbysë situatën: “Ajo që ka ndodhur nuk më befason. Slot duhet ta rregullojë situatën”. Reds do të përpiqen të ngrihen që të shtunën, në ndeshjen e madhe të Premier League kundër Chelsea.
