Robbie Williams ka folur për herë të parë hapur për betejën e tij të fshehtë me sindromën Tourette.
Këngëtari 51-vjeçar, i njohur më parë si pjesë e grupit Take That, ishte i ftuar në episodin e parë të sezonit të ri të podcast-it "I'm ADHD! No You're Not", të moderuar nga komediani Paul Whitehouse dhe specialistja e neuroshkencës Dr. Mine Conkbayir.
Gjatë bisedës ai tregoi se sapo kishte kuptuar se mendimet dhe shqetësimet që kishte prej kohësh ishin shenja të sindromës Tourette.
“Pardje po ecja në rrugë dhe e kuptova se këto mendime ishin pjesë e saj”, tha këngëtari.
Williams po ashtu foli për marrëdhënien e tij të komplikuar me performancat live, duke pranuar se ndihet "i tmerruar" nga skena, megjithëse duket i sigurt dhe energjik. Ai tha se për shumë vite ka fshehur frikën dhe ankthin e tij, duke e maskuar para publikut.
“Kam qenë shumë i frikësuar, por tani më në moshë po e përballoj ndryshe këtë sfidë,” tha Robbie, duke falënderuar bashkëshorten e tij, Ayda Field Williams, e cila i ka ndihmuar të ndryshojë perspektivën.
Sindroma Tourette është një çrregullim neurologjik i trashëguar, i karakterizuar nga tiket motorike dhe vokale që përsëriten në mënyrë të pavullnetshme. Megjithëse nuk ka shërim, trajtimet ndihmojnë në menaxhimin e simptomave.
Një tjetër këngëtar i famshëm me këtë sindromë është Lewis Capaldi, i cili bëri pauzë disa vjeçare për shkak të përkeqësimit të gjendjes së tij.
