Në një intervistë të publikuar të mërkurën, më 1 tetor, për The Hollywood Reporter, artistja 37-vjeçare u pyet nëse ndjehet e sigurt pas vendimit për të hequr dorë nga padia. “Jo, nuk do të thosha se ndihem e sigurt,” u përgjigj ajo.
Megjithatë, ajo theksoi angazhimin e saj me organizata që luftojnë dhunën në familje dhe abuzimet seksuale. “Jam shumë e përkushtuar të jem pjesë e organizatave si Sistah Space dhe No More, për të ndihmuar të mbijetuarit në çdo mënyrë që mundem,” u shpreh ajo.
“Tani nuk është më fjala për mua. Dua vetëm të ec përpara me jetën time.”
FKA twigs, emri i vërtetë i së cilës është Tahliah Debrett Barnett, ka paraqitur një kërkesë për tërheqje të padisë në Gjykatën e Lartë të Kalifornisë, në korrik të këtij viti.
Ajo e kishte ngritur padinë në dhjetor të vitit 2020, duke e akuzuar aktorin për abuzim fizik, seksual dhe psikologjik, si dhe për transmetim të një sëmundjeje seksualisht të transmetueshme pa dijeninë e saj.
Çështja u mbyll me një marrëveshje jashtë gjykate, për një shumë të pazbuluar, para se të niste gjyqi që ishte planifikuar për shtatorin e kaluar.
