Aktorja deklaron se ndarja nga aktori ishte një periudhë "e vështirë dhe traumatike", si për të ashtu edhe për gjashtë fëmijët që ndanë bashkë: Maddox (24), Pax (21), Zahara (20), Shiloh (19), dhe binjakët Knox dhe Vivienne (17).
“Ngjarjet që çuan në ndarjen time nga ish-burri ishin emocionalisht të vështira për mua dhe për fëmijët tanë,” thuhet në dokumentet e siguruara nga Page Six.
“Pasi kërkova divorcin, ia lashë Brad-it kontrollin dhe banimin e plotë në shtëpitë tona familjare në Los Anxhelos dhe në Miraval, pa kompensim. Shpresoja se kjo do ta bënte më të qetë në marrëdhënien me mua pas një periudhe të vështirë.”
Jolie shpjegoi se që pas ndarjes, as ajo dhe as fëmijët nuk janë rikthyer më në Château Miraval, sepse ajo pronë lidhet me kujtime të dhimbshme.
Ajo shton se menjëherë pas ndarjes filloi të kërkonte një shtëpi të re për veten dhe fëmijët, duke e filluar me një shtëpi me qira për shkak të mungesës së mjeteve financiare.
Brad Pitt ka paditur Jolie për shitjen e pjesës së saj në Château Miraval te kompania Stoli Group pa miratimin e tij, gjë që ai e konsideron si shkelje të marrëveshjes. Jolie nga ana tjetër pohon se nuk kishte nevojë për lejen e tij për ta bërë këtë shitje.
Në dokumentet gjyqësore, ajo shpjegon se e kishte të vështirë emocionalisht të negocionte për shitjen e Miraval, pasi ishte një investim i përbashkët, një vend i shenjtë për familjen e tyre, ku ishin martuar dhe ku kishte lindur fëmijët.
Jolie tani kërkon që Pitt të paguajë $33,000 për shpenzimet ligjore që i janë dashur për t’iu përgjigjur një mocioni të tij për dorëzimin e mesazheve private.
“Jolie, përmes avokatëve të saj, i kërkoi vazhdimisht Pitt-it që të tërhiqte kërkesën. Ai refuzoi. Prandaj kërkojmë që ai të mbulojë shpenzimet,” thuhet në dokumentet e dorëzuara në gjykatë.
Një burim i afërt me Brad Pitt u shpreh për Page Six se motivi i aktorit është “të sigurojë të ardhmen financiare të fëmijëve të tij,” duke pretenduar se shitja e aksioneve në Miraval dëmton trashëgiminë që ata do të merrnin.
Burimi gjithashtu shton se kjo është një “çështje biznesi komerciale dhe nuk ka lidhje me divorcin,” duke sugjeruar se Jolie po përdor justifikime për të shmangur procesin ligjor të zbulimit të dokumenteve.
