Një gjykatë federale në Nju Jork ka hedhur poshtë padinë e reperit kanadez Drake kundër shtëpisë diskografike Universal Music Group (UMG), në lidhje me këngën e Kendrick Lamar, “Not Like Us”.
Padia e Drake, e ngritur në janar 2025, akuzonte UMG për shpifje dhe përfshirje në publikimin dhe promovimin e një kënge që e etiketonte atë si "pedofil" dhe bënte thirrje për “veprime të dhunshme” kundër tij.
Megjithatë, më 9 tetor 2025, gjykatësja Jeannette Vargas vendosi të rrëzojë çështjen, duke deklaruar se kënga ishte pjesë e një “beteje të zjarrtë rap-i”, dhe nuk përmbante deklarata faktike që mund të konsiderohen shpifje.
“Edhe pse akuza se [Drake] është pedofil është padyshim serioze, konteksti i një beteje rap me gjuhë nxitëse dhe ofendime të ndërsjella nuk do të bënte një dëgjues të arsyeshëm të besonte se ‘Not Like Us’ përçon fakte të verifikueshme”, shkroi gjykatësja Vargas në vendimin e saj.
Në këngën “Not Like Us”, e cila u publikua në maj 2024 në kulmin e konfliktit mes dy reperëve, Kendrick Lamar i referohet Drake si një “pedofil i certifikuar” dhe përmend se ai duhet të jetë “nën vëzhgim të lagjes”.
Në performancën e Super Bowl LIX në shkurt 2025, ku morën pjesë rreth 127.7 milionë shikues, fjala “pedofil” ishte hequr nga teksti i transmetuar, por Lamar hodhi një shikim dukeqeshur në kamera kur tha:
“Say, Drake, I hear you like 'em young” (“Thuhet, Drake, që të pëlqejnë të rejat”).
Drake pretendoi në padi se UMG jo vetëm që lejoi publikimin e këngës, por e përdori për ta bërë virale, duke dëmtuar rëndë imazhin e tij.
Ai deklaroi se “asnjëherë nuk ka pasur marrëdhënie me të mitura dhe nuk është akuzuar apo dënuar ndonjëherë për ndonjë akt kriminal”.
Megjithatë, UMG e quajti padinë “të pavend dhe fyese ndaj lirisë artistike”. Në një deklaratë për revistën PEOPLE, UMG tha:
“Kjo padi nuk duhej të pranohej kurrë. Jemi të kënaqur me hedhjen poshtë të saj nga gjykata dhe vazhdojmë të mbështesim karrierën e Drake.”
