Kreu i Prokurorisë së Posaçme, Altin Dumani në seancën raportuese në Komisionin e Ligjeve u pyet dhe për çështjet e Metës dhe Berishës.
Dumani deklaroi se sa i përket çështjes “Berisha” është hetuar brenda afatit në një vit, nga regjistrimi i çështjes e deri në dërgimin e saj për gjykim.
Sa i përket çështjes “Meta”, kreu i SPAK deklaroi se është në fazën e hetimit paraprak dhe nevojitet ndihma e autoriteteve të huaja.
Dumani tha se ai si kreu i SPAK, nuk ka asnjë kompetencë për të ndërhyrë në çështjet konkrete.
“Prokurorët në SPAK e ushtrojnë ndjekjen penale në mënyrë të plotë. Si drejtues i SPAK nuk kam asnjë kompetencë për të ndërhyrë në çështje konkrete, mund të jap vetëm udhëzime jodetyruese, të cilat nuk prekin thelbin e çështjes. Kam deleguar te prokurorët e posaçëm për të nënshkruar çdo akt, çdo shkresë për çështje konkrete. Kam garantuar pavarësinë e prokurorëve të posaçëm. Prokurori vendos strategjinë hetimore dhe masën e sigurisë. Çdo kërkesë për ndryshim mase kalon në gjykata. Çështja është hetuar në një vit, nga regjistrimi deri në dërgimin në gjykim. Është në fazën e hetimit paraprak. Është e nevojshme ndihma juridike nga autoritete hetimore të huaja.
Po përpiqemi të profilizojmë prokurorë të caktuar për këto çështje. Bashkëpunimin me institucionet e huaja do ta quaja të shkëlqyer”, tha Dumani.
