Sipas një deklarate të një zëdhënësi të Talibanëve afganë, më shumë se 10 civilë janë vrarë dhe 100 të tjerë janë plagosur gjatë përleshjeve.
Përplasjet ndodhën gjatë natës në rajonin afgan të Spin Boldak, ku u raportua përdorimi i mortajave, tha për AFP Ali Mohammad Haqmal, zëdhënës i sektorit të inteligjencës së qytetit, duke shtuar se 15 civilë humbën jetën.
Ky bilanc u konfirmua për AFP nga Abdul Jan Barak, një zyrtar në spitalin e zonës Spin Boldak, i cili bëri të ditur se më shumë se 80 gra dhe fëmijë janë plagosur.
Zëdhënësi i qeverisë së Talibanëve, Zabihullah Mujahid, akuzoi forcat pakistaneze se “edhe një herë” kanë kryer sulme në territorin afgan, duke përdorur armë të lehta dhe të rënda në zonën e Spin Boldak.
Sipas tij, 12 civilë janë vrarë dhe rreth 100 të tjerë janë plagosur.
Ky përshkallëzim i tensioneve midis dy vendeve të Azisë Jugore, dikur aleate, ka shpërthyer pas kërkesave të Islamabadit që qeveria talibane të marrë masa kundër militantëve që po shtojnë sulmet brenda Pakistanit, duke pretenduar se ata veprojnë nga strehimore në territorin afgan.
Talibanët mohojnë praninë e militantëve pakistanezë në Afganistan.
Përleshjet nisën për herë të parë të shtunën në mbrëmje, kur Kabuli nisi një operacion në të paktën pesë provinca përgjatë kufirit. Qeveria talibane sqaroi se sulmet ndaj forcave pakistaneze ishin “hakmarrje për shkeljet e përsëritura dhe sulmet ajrore të ushtrisë pakistaneze në territorin afgan”, pas shpërthimeve në Kabul.
Islamabadi premtoi një “përgjigje të fuqishme” të dielën dhe u raportuan dhjetëra viktima nga të dyja palët.
