Deputeti i Lidhjes Demokratike të Kosovës, Armend Zemaj është përfshirë në një incident fizik me një qytetar teksa po zhvillonte një intervistë. Lidhur me ngjarjen është njoftuar policia e Kosovës, e cila ka marrë të gjitha pamjet e xhiruara nga kamera gjatë intervistës publike së Zemajt.
Vetë deputeti ka reaguar për rastin përmes një njoftimi në rrjetet sociale, ku shprehet se përplasja fizike ka ndodhur pasi qytetari e ka ofenduar. Zemaj shkruan se veprimi i tij ishte në mënyrë vetëmbrojtje, ndërsa thekson se duhet të kishte ruajtur qetësinë në çdo rrethanë dhe se dhuna nuk është përgjigje e drejtë.
"Sot gjatë një interviste publike ndodhi një situatë e pakëndshme, për të cilën ndjej keqardhje të sinqertë. Një qytetar, nuk e di a ishte e rastit apo me qellim te caktuar, këtë do e vertetojnë policia, më ofendoi dhe më provokoi verbalisht me fjalë të papranueshme, para medias dhe gazetarit që ishim në intervistë. Në atë moment reagova në mënyrë të vetëmbrojtjes në afekt, gjë e cila nuk përfaqëson as bindjet e mia personale, as parimet që unë përfaqësoj si deputet dhe si anëtar i Lidhjes Demokratike të Kosovës.
Në këto raste sulmi dhe fyerjesh të ulëta, sigurisht do duhej të ruaja qetësinë dhe dinjitetin në çdo rrethanë dhe pavarësisht provokimit, i cili nuk me ka ndodhë kurrë gjatë karrierës sime, dhuna, në çfarëdo forme, nuk është përgjigje e drejtë. Për këtë veprim, shpreh keqardhje dhe kërkoj falje publike.
Kam respekt të plotë për çdo person, për çdo mendim dhe çdo kritikë, pavarësisht se sa e ashpër mund të jetë ajo, e imja është te mos reagoj me emocione. Andaj duhet të më shërbejë si mësim për të qenë më i durueshëm dhe më i përmbajtur në çdo situatë. Faleminderit të gjithëve për mirëkuptimin", shprehet Zemaj në postimin e tij.
