Zbardhen detaje të reja nga shpërthimi me tritol në një lokal në Kamëz, ku policia ka arrestuar tre autorë të dyshuar dhe ka shpallur një tjetër në kërkim. Sipas hetimeve, motivi ishte mosshlyerja e një gjobe prej 500 mijë eurosh.
Në pranga ranë Jeton Lami, ish-oficeri i operacionales i përfshirë më herët në çështjen e shoqërimit të Ervis Martinajt para zhdukjes së tij, si edhe Florin Domi dhe Flogert Mezhika, banues në Kamëz dhe të dyshuar si pjesë e një grupi gjobëvënësish. Në kërkim është shpallur Ervis Lami, 31 vjeç, person me precedentë të rëndë kriminal, i cili u arratis pasi gjatë një kontrolle në janar policia i gjeti një automatik me silenciator.
Pamjet e kamerave tregojnë se një nga autorët, i maskuar si punëtor pastrimi, vendosi lëndën plasëse në fasadën e lokalit dhe u largua me biçikletë. Objekti është në pronësi të Saimir Sinës, rezident në Itali, dhe i dhënë me qira dy kunetërve Klodjan Murati dhe Benard Elezi, të cilët deklaruan se nuk kanë asnjë lidhje me autorët.
Sipas policisë, grupi kriminal i kishte kërkuar pronarit që të mos ua jepte biznesin me qira kunetërve, ndryshe do të duhej të paguante 500 mijë euro. Pas refuzimit, autorët vendosën eksplozivin, që shkaktoi vetëm dëme materiale.
Të dyshuarit akuzohen për “Shkatërrim prone me eksploziv” dhe “Shtrëngim me anë të dhunës për dhënie pasurie”.
