Pesëdhjetë nga 315 fëmijët e rrëmbyer nga një shkollë katolike në shtetin Niger të Nigerisë kanë arritur të ikin dhe janë ribashkuar me familjet e tyre, njofton Shoqata e Krishterë e Nigerisë.
Ndërkohë, 265 fëmijë të tjerë dhe 12 mësues mbeten peng, ndërsa ushtria dhe forcat e sigurisë po zhvillojnë një operacion të gjerë kërkim-shpëtimi.
Rrëmbimi në Shkollën St Mary në Papiri është një nga më të mëdhenjtë në historinë e vendit, duke tejkaluar edhe rrëmbimin famëkeq të Chibokut në vitin 2014.
Autoritetet në disa shtete, përfshirë Niger, Kebbi, Katsina, Yobe dhe Kwara, urdhëruan mbylljen e shkollave pas këtij incidenti dhe një tjetër rrëmbimi të 20 nxënësve në Kebbi.
Presidenti Bola Tinubu urdhëroi rekrutimin e 30,000 policëve të rinj, si dhe rianalizimin e roleve të policisë në shërbimet për personat VIP, për të përqendruar vëmendjen tek mbrojtja e zonave të rrezikuara.
Sipas përfaqësuesve të krishterë në zonë, arratisja e 50 fëmijëve ka ndodhur mes të premtes dhe të shtunës, në kushte të rrezikshme. Forcat e sigurisë po kontrollojnë pyje dhe rrugë të izoluar ku dyshohet se janë dërguar pengjet.
Prindërit dhe familjarët janë në gjendje ankthi. Disa prej tyre i thanë BBC-së se fëmijët e tyre u morën papritur gjatë natës dhe se “duan vetëm t’i shohin ata në shtëpi”.
