Marina Mbretërore ka shtuar patrullimet e saj në Kanalin Anglez, duke monitoruar nga afër dy anije luftarake ruse që kanë kaluar nëpër ujërat britanike në dy javët e fundit. Ky veprim vjen në një kohë tensionesh të larta midis Londrës dhe Moskës, pas incidentit me anijen ruse Yantar, e cila dyshohet se përdori një lazer ndaj pilotëve britanikë të RAF.
Autoritetet britanike thonë se mbeten në gatishmëri të plotë për të mbrojtur ujërat e vendit. Sipas raporteve të medias britanike, HMS Severn po monitoronte korvetën ruse Stoikiy dhe anijen e furnizimit Yelnya, të cilat po shkonin në perëndim përmes Doverit drejt Kanalit Anglez.
Mbikëqyrja u transferua më pas te një aleat i NATO-s pranë bregdetit të Bretanjës në Francën veriperëndimore, ndërsa HMS Severn mbeti në distancë, gati për të reaguar ndaj çdo aktiviteti të papritur.
"Kjo është hera e parë që Yantar ka përdorur këtë metodë kundër RAF. Ne po e marrim shumë seriozisht", tha Sekretari i Mbrojtjes i Mbretërisë së Bashkuar John Healy, duke e përshkruar përdorimin e lazerëve si "veçanërisht të rrezikshëm" dhe duke shtuar se Britania ishte e përgatitur të përgjigjej në përputhje me lëvizjet e anijes.
Sekretari i Mbrojtjes njoftoi ndryshime në rregullat e angazhimit të forcës detare për të rritur mbikëqyrjen e Yantar kur është në ujërat britanike. Ministria e Mbrojtjes theksoi se forcat e armatosura britanike mbeten në patrullim "nga Kanali Anglez në Polin e Veriut", në përgjigje të aktivitetit në rritje rus që kërcënon ujërat britanike.
Që nga pushtimi i Ukrainës nga Rusia në vitin 2022, misionet e mbikëqyrjes së anijeve dhe nëndetëseve ruse janë bërë më të shpeshta, me Marinën Mbretërore dhe RAF që monitorojnë rregullisht çdo kërcënim të mundshëm për sigurinë kombëtare.
