Elton John ka treguar arsyen pse nuk po e humb shpresën, pavarësisht se ka humbur plotësisht shikimin në syrin e djathtë pas një infeksioni të rëndë vitin e kaluar.
“Ka qenë rrënues,” tha muzikanti për Variety, në një intervistë të botuar të martën. “Sepse humba syrin e djathtë dhe i majti nuk është mirë, 15 muajt e fundit kanë qenë jashtëzakonisht të vështirë. Nuk kam mundur të shoh asgjë, të shikoj diçka, të lexoj.”
Këngëtari i “Tiny Dancer” pësoi infeksionin e syve gjatë një pushimi në jug të Francës verën e kaluar. Edhe pse u prekën të dy sytë, ai përfundimisht humbi shikimin në syrin e djathtë.
Megjithatë, fituesi i shumë çmimeve Grammy thotë se nuk e ka humbur optimizmin për rikthimin e shikimit.
“Kam pasur një jetë të mrekullueshme, dhe ka shpresë,” u shpreh ai. “Duhet vetëm durim – një ditë shkenca do të më ndihmojë. Kur kjo të ndodhë, gjithçka do të jetë mirë.”
Artisti legjendar u shpreh se ka mësuar të jetë i fortë dhe stoik, duke shtuar: “Nuk duhet të dorëzohesh. Duhet të luftosh gjithmonë për ta përmirësuar situatën.”
Pavarësisht sfidave shëndetësore, John tregon se është mirënjohës që ende mund të këndojë dhe të luajë në piano, si dhe për mbështetjen e familjes së tij. Ai dhe bashkëshorti i tij, David Furnish, me të cilin u martua në vitin 2014, janë prindër të dy djemve, Zachary, 14 vjeç, dhe Elijah, 12 vjeç.
“Kam një familje të mrekullueshme, dy djem të jashtëzakonshëm dhe Davidin,” tha John. “Ndonjëherë më rëndon emocionalisht, por në përgjithësi jam me fat.”
Mbreti i hiteve si “Rocket Man” dhe “I’m Still Standing” zbuloi gjithashtu se shumë prej miqve të tij të famshëm kanë qenë pranë tij gjatë kësaj periudhe të vështirë. “Paul McCartney më telefonon me FaceTime sa herë të mundet për të parë si jam. E njëjta gjë me Pete Townshend, Mick Jagger e shumë të tjerë,” tregoi ai. “Edhe një email nga Keith Richards me fjalët ‘Të duam shumë’ më ndriçon ditën.”
John e bëri publike gjendjen e tij për herë të parë në shtator 2024, kur njoftoi se infeksioni i rëndë i kishte lënë shikim vetëm në njërin sy. “Jam në proces shërimi,” kishte thënë në atë kohë, “por është shumë i ngadalshëm dhe do të duhet kohë që të rikthehet shikimi.”
