Qeveria daneze ka vendosur një “Night Watch” (roje nate) në ministrinë e jashtme, jo për të mbajtur jashtë të egrit dhe “Walker”-at e Bardhë si në “Game of Thrones”, por për të monitoruar deklaratat dhe lëvizjet e Donald Trump teksa Kopenhageni fle.
“Roja e natës” fillon punën në orën 5 pasdite, sipas orës lokale, çdo ditë, dhe në orën 7 të mëngjesit harton dhe shpërndan një raport në qeverinë daneze dhe departamentet përkatëse rreth asaj që u tha dhe ndodhi.
Kuptohet se kjo lëvizje është bërë pas përplasjeve diplomatike midis Kopenhagenit dhe Uashingtonit mbi Groenlandën këtë pranverë, kur presidenti amerikan kërcënoi të merrte kontrollin e ishullit Arktik.
Gazeta vendase “Politiken” tha se iniciativa ishte një nga disa shembuj se si diplomacia daneze dhe shërbimi civil i vendit u detyruan të përshtateshin me realitetin e ri të administratës së dytë Trump.
Një burim pranë ministrisë së jashtme i tha “The Guardian”: “Është e drejtë të thuhet se situata në Groenlandë dhe ndryshimi kohor midis Danimarkës dhe Shteteve të Bashkuara ishin një faktor mjaft i rëndësishëm që çoi në këtë vendim gjatë pranverës.”
Në vend që të gjithë të merrnin menjëherë telefonat e tyre për të parë lajmet nga SHBA-ja, Ministria e Jashtme tha se në vend të kësaj kishte bërë një "përpjekje kolektive" për të qëndruar e përditësuar mbi lëvizjet e Trump.
Jacob Kaarsbo, një ish-analist kryesor në agjencinë daneze të inteligjencës së mbrojtjes, tha se ky zhvillim tregon, "siç e kemi ditur gjithmonë", se ideja që SHBA-ja ishte aleati më i madh dhe më i rëndësishëm i Danimarkës kishte vdekur.
"Aleancat ndërtohen mbi vlera të përbashkëta dhe një perceptim të përbashkët të kërcënimit", tha Kaarsbo. "Trump nuk ndan asnjërën prej tyre me ne dhe do të argumentoja se ai nuk e ndan atë me shumicën e evropianëve." ©LAPSI.al
