Departamenti i Brendshëm i SHBA , i cili drejton parqet kombëtare të vendit, tha se çdo vizitor ndërkombëtar do të duhet të paguajë 100 dollarë për person, përveç tarifave ekzistuese për të hyrë në 11 nga vendet më të njohura. Nga viti 2026, jo-rezidentët do të duhet gjithashtu të paguajnë më shumë se 250 dollarë për një biletë vjetore në parqe, ndërsa qytetarët amerikanë dhe banorët e përhershëm do të vazhdojnë të paguajnë 80 dollarë.
BBC shkruan se rritja e tarifës synon të vërë familjet amerikane në plan të parë dhe pasqyron qëllimin e Presidentit Donald Trump, për t'i bërë parqet më të arritshme dhe të përballueshme për qytetarët amerikanë,
"Këto politika sigurojnë që taksapaguesit amerikanë, të cilët tashmë mbështesin Sistemin e Parqeve Kombëtare, të vazhdojnë të gëzojnë akses të përballueshëm, ndërsa vizitorët ndërkombëtarë kontribuojnë në mirëmbajtjen dhe përmirësimin e parqeve tona për brezat e ardhshëm", tha Sekretari i Brendshëm Doug Burgum.
Rritja do të hyjë në fuqi në fillim të vitit 2026, së bashku me lançimin e një sistemi të përmirësuar të rezervimeve online dhe akses më të mirë për motoçiklistët në të gjitha parqet. Në njoftimin e tij, departamenti vuri në dukje gjithashtu tetë ditë patriotike pa tarifa vetëm për banorët për vitin 2026, duke përfshirë Ditën e Përkujtimit, Ditën e Pavarësisë dhe Ditën e Veteranëve.
Rritja e tarifave vjen pas një urdhri ekzekutiv, të nënshkruar nga Trump në korrik, për të rritur tarifat e hyrjes në parqet kombëtare për vizitorët e huaj. Të ardhurat shtesë do të siguronin fonde për ruajtjen dhe mirëmbajtjen e këtyre vendeve, tha Shtëpia e Bardhë në atë kohë edhe pse administrata Trump planifikonte shkurtime të thella në buxhetin e Shërbimit të Parqeve.
Parqet kombëtare të SHBA-së kanë parë një numër rekord turistësh në vitet e fundit, me mbi 331 milionë vizitorë në vitin 2024. Kjo është një rritje prej të paktën 6 milionë krahasuar me një vit më parë. Parqet më të vizituara të vendit përfshijnë Everglades në Florida, Yosemite në Kaliforni dhe Malet Shkëmbore të Kolorados.
