Eksperti amerikan, Edward Joseph deklaroi në Kongresin amerikan se në Shqipëri ka rënë pluralizmi politik. Mesazhi i fortë u dha gjatë diskutimeve në Komitetin për Politikë të Jashtme të Dhomës së Përfaqësuesve të Shteteve të Bashkuara për çështjen e Ballkanit.
Joseph citoi raportin e OSBE/ ODIHR për zgjedhjet e 11 majit, i cili identifikoi një sërë ndërhyrjesh nga qeveria në procesin zgjedhor.
Po ashtu ai u ndal edhe në problemet që lidhen me reformën në drejtësi duke thënë se ato minojnë besimin publik dhe të drejtës për proces të rregullt ligjor. Ai sugjeroi se Washington zyrtar duhet të ngrej pyetje mbi sundimin e ligjit, arrestimet dhe ndjekjet penale të liderve të opozitës si dhe rënien e pluralizmit politik në Shqipëri.
“Më në fund e shkëputur nga rruga e vështirë e anëtarësimit të Maqedonisë së Veriut në BE, Shqipëria po bën përparime mbresëlënëse drejt anëtarësimit.
Sundimi i ligjit mbetet një kërkesë thelbësore. Shtetet e Bashkuara dhe shtetet kryesore të BE-së prej kohësh kanë mbështetur përpjekjet për të ndërtuar një gjyqësor të pavarur, të besueshëm dhe efikas në Shqipëri. Të dhënat sugjerojnë një stok të fryrë çështjesh të mbetura pezull, duke i lënë qytetarët të presin me vite për një vendim përfundimtar. Këto vonesa minojnë besimin publik dhe të drejtën për proces të rregullt ligjor.
Raporti i vëzhgimit të zgjedhjeve i OSBE/ODIHR për zgjedhjet e majit identifikoi një sërë ndërhyrjesh në procesin zgjedhor. ODIHR citoi raportime për frikësim, keqpërdorim të burimeve publike dhe presion ndaj punonjësve publikë, raste frikësimi dhe blerje votash, si dhe probleme me sekretin e votës.
Ndërsa SHBA vazhdon bashkëpunimin e ngushtë me Tiranën, një aleate besnike e NATO-s dhe partnere e SHBA-së, Uashingtoni duhet të ngrejë pyetje lidhur me sundimin e ligjit, integritetin dhe efikasitetin e gjyqësorit, arrestimet dhe ndjekjen penale të liderëve të opozitës, si dhe rënien e pluralizmit politik,” tha Joseph.
