Humbja e rëndë që pësoi në zgjedhjet e fundit lokale ka shkaktuar një valë dorëheqjesh në drejtimin e partisë më të madhe opozitare në Maqedoninë e Veriut, “Lidhja Socialdemokrate” (SDSM).
Këto dorëheqje u dhanë pas kërkesës së kryetarit të partisë, Venko Filipçe. Konkretisht, kanë dhënë dorëheqjen nënkryetarja, katër nënkryetarët e tjerë, sekretari i përgjithshëm si edhe të gjithë anëtarët e Komitetit Ekzekutiv të SDSM.
Brenda rreth dy javësh pritet të mblidhet Komiteti Qendror i SDSM për të caktuar pasuesit e funksionarëve që u larguan.
Kjo situatë vjen si pasojë e rezultatit shumë të dobët në zgjedhjet lokale, i cili ka thelluar pakënaqësinë dhe përçarjet e brendshme në parti.
Venko Filipçe ka deklaruar se ai vetë nuk ka ndërmend të japë dorëheqjen nga drejtimi i partisë dhe se do të marrë personalisht përsipër procesin e ringritjes dhe rinovimit të saj.
SDSM është një nga dy partitë kryesore politike në Maqedoninë e Veriut dhe përfaqësuesja kryesore e krahut socialdemokrat dhe të qendrës së majtë në vend. Ajo u themelua në vitin 1991 si pasuese e “Lidhjes së Komunistëve të Maqedonisë” dhe, pas shpërbërjes së Jugosllavisë, u shndërrua në një parti moderne me orientim evropian.
Partia ka qeverisur disa herë që nga pavarësia e vendit. Një periudhë veçanërisht e rëndësishme ishte qeverisja e Zoran Zaev (2017–2022), gjatë së cilës u nënshkrua Marrëveshja e Prespës, çka çoi në ndryshimin e emrit kushtetues në “Maqedonia e Veriut” dhe hapi rrugën për anëtarësimin në NATO si edhe për proceset e integrimit evropian.
Megjithatë, përkundër reformave, SDSM është përballur me konflikte të brendshme, konsum të pushtetit dhe pakënaqësi në rritje nga votuesit, gjë që ka sjellë humbje të njëpasnjëshme elektorale vitet e fundit.
