Kim Kardashian ka treguar se vendosi të ndryshonte emrin e saj pak para se ajo dhe familja e saj të bëheshin të njohur me reality shoun “Keeping Up With the Kardashians”.
Në një intervistë të re për Time, ajo tha se për vite me radhë përdorte emrin Kimberly, derisa pa emrin e saj të plotë në ekran gjatë xhirimeve të programit.
“Gjithmonë jam quajtur Kimberly. Por kur pamë shiritin në ekran ku shkruhej Kimberly Kardashian, mendova: ‘Është shumë i gjatë për t’u thënë’. Kështu që vendosëm ta shkurtonim në Kim,” shpjegoi ajo.
Kardashian shtoi me të qeshur se miqtë e rinisë dhe babai i saj ende e thërrasin Kimberly.
Themeluesja e SKIMS pranoi gjithashtu se ishte arsyeja kryesore pse familja pranoi të hynte në botën e reality TV. Sipas saj, dëshira për të qenë në një reality show nisi që në fëmijëri, kur ndiqte MTV-në dhe “The Real World”.
“E dëshiroja me gjithë shpirt. I thashë shoqes sime të ngushtë që kur të bëheshim 18 vjeç, do të bënim një video dhe do t’ia dërgonim MTV-së,” rrëfeu Kim.
Ajo kujtoi se shoqja i premtoi se do të bëhej menaxherja e saj, pasi babai i vajzës punonte në industrinë e muzikës.
Edhe pse menaxherja e saj përfundimisht u bë e ëma, Kris Jenner, Kim përfundoi duke punuar me producentët e “The Real World”, pasi “Keeping Up With the Kardashians” u realizua nga kompania Bunim/Murray – e njëjta shtëpi produksioni.
“Keeping Up With the Kardashians” përfundoi në vitin 2021 pas 14 vitesh transmetimi në E! Network. Prej atëherë, familja është zhvendosur në platformën Hulu me show e ri “The Kardashians”.
