Një sulm me dron në qytetin Kalogi, në rajonin e Kordofanit Jugor të Sudanit, ka goditur një çerdhe duke vrarë të paktën 50 persona, mes tyre 33 fëmijë. Lajmi u bë i ditur nga Rrjeti i Mjekëve të Sudanit dhe ushtria sudaneze, të cilat akuzuan Forcat e Mbështetjes së Shpejtë (RSF) për përgjegjësinë e sulmit të së enjtes. RSF nuk ka dhënë ende një reagim zyrtar për akuzat. Ndërkohë, vetë grupi paramilitar akuzoi ushtrinë sudaneze për një sulm të premten ndaj një tregu dhe një depoje karburanti në pikën kufitare Adre me Çadin, në rajonin e Darfurit. Sipas tyre, zona përdorej për shpërndarjen e ndihmave dhe furnizimeve tregtare.
Që prej prillit 2023, Sudani është përfshirë në një luftë të përgjakshme për pushtet midis ushtrisë dhe RSF-së, dikur aleatë. Rajonet e Kordofanit – Kordofani i Veriut, Jugut dhe Perëndimit – të shtrira mes kryeqytetit Khartum dhe Darfurit, janë shndërruar në një vijë të përparësishme të konfliktit. Betejat janë ashpërsuar teksa ushtria përpiqet të avancojë drejt Darfurit, duke rrezikuar popullsinë prej rreth tetë milionë banorësh.
