Kryeministri izraelit Benjamin Netanyahu do të takohet me Presidentin e SHBA-së Donald Trump më 29 dhjetor, për të diskutuar mbi hapat e ardhshëm në armëpushimin në Gaza, tha të dielën një zëdhënës i qeverisë izraelite. Netanyahu tha se do të diskutonte me Trump fazën e dytë të planit të SHBA-së. Kjo për t'i dhënë fund luftës në Gaza më vonë këtë muaj.
Një armëpushim midis Izraelit dhe Hamasit hyri në fuqi në tetor. Mediat e huaja shkruajnë se të dyja palët kanë akuzuar vazhdimisht njëra-tjetrën për shkelje të armëpushimit, ndërsa mbeten boshllëqe të mëdha në çështjet kritike që mbeten për t'u diskutuar sipas planit të Trump për t'i dhënë fund luftës. Kjo duke përfshirë çarmatimin e Hamasit, qeverisjen e Gazës së pasluftës dhe përbërjen dhe mandatin e një force ndërkombëtare sigurie në enklavë.
"Kryeministri do të takohet me Presidentin Trump të hënën, më 29 dhjetor, për të diskutuar hapat dhe fazat e ardhshme dhe forcën ndërkombëtare për të stabilizuar planin e armëpushimit", tha zëdhënësja e qeverisë Shos Bedrosian në një konferencë online me gazetarët.
Zyra e kryeministrit tha më 1 dhjetor se Trump e kishte ftuar Netanyahun në Shtëpinë e Bardhë. Mediat izraelite raportuan më vonë se të dy udhëheqësit do të takoheshin në Florida.
