Klinikat stomatologjike kanë mbirë si kërpudhat pas shiut në vendin tonë, duke ofruar shërbim dentar jo vetëm për shtetasit vendas, por kryesisht edhe për të huajt, aq sa turizmi dentar ka shënuar një lulëzim vitet e fundit me apo pa cilësi.
Sikurse ka klinika stomatologjike shumë të mira, të cilat ofrojnë shërbim dentar me standarde bashkëkohore, ka edhe nga ato që abuzojnë, duke përfituar nga fakti se ky treg aktualisht është me akses në rritje edhe nga turistët e huaj.
Gjatë një kontrolli të ushtruar nga Inspektorati Shëndetësor Shtetëror gjatë vitit 2024 në kabinetet dentare publike dhe jo publike, si dhe laboratorë dentarë, janë konstatuar një sërë shkeljesh që lidhen jo vetëm me kushtet higjieno-sanitare, por edhe me subjekte që operonin në treg pa pasur një licencë. Gjashtë klinika dentare janë gjobitur me vlerën 50 mijë lekë të reja pasi ushtronin aktivitet pa pasur licencë nga Qendra Kombëtare e Licencimit. Në katër klinika të tjera stomatologjike, Inspektorati Shëndetësor Shtetëror ka vendosur masë administrative gjobë në vlerën 50 mijë lekë të reja pasi mjeku stomatolog nuk e kishte rinovuar lejen e ushtrimit të profesionit, pasi i kishte skaduar.
Po kështu, në të tjera klinika, laboratorë dhe klinika stomatologjike është konstatuar mungesë e kushteve higjieno-sanitare, por në raportin e Inspektoratit këto klinika dhe laboratorë nuk identifikohen me emra. Në 583 inspektime dhe riinspektime janë vendosur 11 gjoba dhe 38 paralajmërime. Por kjo nuk është e papritur, pasi vetëm para pak kohësh, në kryeqytet policia konstatoi tre klinika dentare jopublike të cilat përdornin pajisje dhe medikamente të skaduara ose me origjinë të dyshimtë tek pacientët.
