Beteja ligjore mes qeverisë shqiptare dhe sipërmarrësit italian Francesko Becchetti, e nisur një dekadë më parë, po rezulton një barrë e madhe financiare për buxhetin e shtetit. Pas vendimit fillestar të Gjykatës së Arbitrazhit të Bankës Botërore, ICSID, që në vitin 2019 dënoi Shqipërinë me 110 milionë euro, qeveria e Edi Ramës u përpoq ta rrëzonte këtë vendim në Apelin e Arbitrazhit në Paris. Por pak ditë më parë, edhe kjo gjykatë la në fuqi vendimin, duke vulosur dënimin më të madh financiar ndaj shtetit shqiptar në historinë e tij.
Rezultati nuk është vetëm gjoba e majme. Paçka se kryeministri Rama deklaroi publikisht në 2019 se nuk do t’i paguante Becchettit asnjë qindarkë, duke e quajtur “mashtrues” dhe “marifetçi”, beteja për të ndryshuar vendimin ka prodhuar një kosto të re dhe të rëndë: shpenzimet për avokatët ndërkombëtarë.
Vetëm përgjatë viteve të fundit, qeveria ka paguar mbi 3 miliardë lekë të vjetra, rreth 3 milionë euro, për shërbime ligjore. Në muajin nëntor 2025 janë kryer dy pagesa të reja me vlerë rreth 300 mijë euro, duke e çuar edhe më tej faturën e taksapaguesve.
Konflikti me Becchettin e ka origjinën në fund të vitit 2014, kur televizioni i tij, “Agon Channel”, u përplas me qeverinë për shkak të linjës editoriale. Sipas palës italiane, presioni politik i ushtruar nga autoritetet shqiptare u shoqërua me procedime penale të motivuara dhe aksione policore të orientuara për ta goditur sipërmarrësin. Becchetti u largua nga Shqipëria për t’i shpëtuar një urdhër arresti, duke iu drejtuar Arbitrazhit Ndërkombëtar për kompensim. Gjykata i dha të drejtë, duke konstatuar se veprimet e shtetit shqiptar i kishin shkaktuar dëme të konsiderueshme biznesit të tij.
Si pasojë e mosshlyerjes së gjobës, përmbaruesit ndërkombëtarë kanë ndërhyrë mbi pasuritë e shtetit shqiptar. Një prej masave më të rënda ka qenë bllokimi i dhjetëra milionë eurove të kompanisë publike Albcontrol, për të detyruar qeverinë të zbatojë vendimin e arbitrazhit.
Ky episod përmbledh një humbje të dyfishtë: jo vetëm një faturë e paprecedentë kompensimi, por edhe miliona euro të tjera të shpenzuara në përpjekjen e pasuksesshme për ta shmangur atë. Në fund, taksapaguesit shqiptarë po paguajnë koston e një lufte të humbur, të nisur për arsye politike dhe të ndjekur deri në fund nga qeveria, me çmimin më të lartë të mundshëm.
