Dhëndri i Presidentit amerikan Donald Trump, Jared Kushner, ka konfirmuar se ka hequr dorë nga planet e tij për të ndërtuar një hotel në emër të Trump në Serbi pas një vale reagimesh negative nga qytetarët vendas.
“The Wall Street Journal” raporton se pas protestave dhe padive, Kushner dhe grupi i tij i kapitaleve private, “Affinity Partners” anuluan planet për të rindërtuar në një vend në Beograd të bombarduar nga NATO si një projekt të markës “Trump”.
Plani për një treshe kullash në atë vend u përball nga një sërë vështirësish. Një prokuror special paditi një ministër të qeverisë serbe dhe tre persona të tjerë në lidhje me planin.
“Meqenëse projektet kuptimplote duhet të bashkojnë në vend që të ndajnë, dhe nga respekti për popullin e Serbisë dhe qytetin e Beogradit, ne po tërheqim kërkesën tonë dhe po tërhiqemi në këtë kohë" - tha një zëdhënës i kompanisë së Kusher.
Ky veprim u konsiderua si një "fund i menjëhershëm i një projekti gjithnjë e më të diskutueshëm në të cilin Kushner - tashmë një figurë publike dhe një ndërmjetësues i frytshëm marrëveshjesh - ka punuar për më shumë se 2 vjet", raportoi “The Wall Street Journal”.
Para rikthimit të dytë të Trump në Shtëpinë e Bardhë, Kushner kishte thënë se nuk do të rikthehej në detyra qeveritare; megjithatë, duket se kjo ka ndryshuar. Kushner është përfshirë në negociatat midis Rusisë dhe Ukrainës si përfaqësues i SHBA-së dhe gjithashtu ka pasur një përfshirje të ngjashme gjatë gjithë negociatave të paqes në Gaza.
"Njëkohësisht, ai drejton Affinity, një firmë me kapital privat prej 4.8 miliardë dollarësh që investon globalisht dhe financohet kryesisht nga qeveritë e Lindjes së Mesme", - raporton “The Wall Street Journal”, citon lapsi.al. "Kjo kompani është pjesë e një blerjeje rekord prej 55 miliardë dollarësh të Electronic Arts dhe po ndihmon në financimin e ofertës së Paramount për Warner Bros."
Prokuroria për Krim të Organizuar në Serbi ngriti aktakuzë ndaj ministrit të Kulturës, Nikolla Sellakoviç, të akuzuar për parregullsi në heqjen e statusit të pasurisë kulturore për ndërtesat e kompleksit “Shtabi i Përgjithshëm” në qendër të Beogradit.
Prokuroria njoftoi këtë të hënë (15 dhjetor) se aktakuzë është ngritur edhe ndaj sekretares së Ministrisë së Kulturës, ushtruesit të detyrës së drejtorit të Institutit Republikan për Mbrojtjen e Monumenteve të Kulturës dhe ushtruesit të detyrës së drejtorit të Institutit për Mbrojtjen e Monumenteve të Kulturës të Qytetit të Beogradit. Të gjithë dyshohen për veprat penale të keqpërdorimit të detyrës zyrtare dhe falsifikimit të dokumenteve zyrtare.
Po projekti për ishullin e Sazanit?
Ndryshe nga Beogradi duket se në Tiranë nuk asnjë ndryshim të planeve për të ngritur një kompleks luksoz në ishullin e Sazanit dhe lagunën e Nartës. Pak kohë më parë kryeministri Rama deklaroi në një konferencë të zhvilluar në Bruksel se projekti është në procesin e negociatave. Për më tepër, ndryshe nga Beogradi, në Tiranë nuk proteston askush për këtë çështje. ©LAPSI.al
