Një ngjarje e rëndë tronditi sot zonën e “Qafës së Llogarasë”, ku trupi i ish-efektivit të policisë, Artjol Xhelo, 32 vjeç, u gjet i djegur brenda automjetit të tij, një BMW. Xhelo, personi që shihni në foton e mësipërme, ishte banues në fshatin Banaj të Bashkisë Dimal, kishte punuar më parë disa vite në Drejtorinë Vendore të Policisë Berat si pjesë e Forcave Operacionale “Shqiponjat”.
Mësohet se gjatë karrierës së tij Xhelo kishte përjetuar probleme të theksuara psikologjike dhe periudha të depresionit. Për këtë arsye, në vitin 2023 ai u transferua nga Forcat “Shqiponjat” në Postën e Policisë Poliçan. Gjatë kësaj periudhe, ish-efektivit i humbi arma e shërbimit, dhe pas vendosjes së masës disiplinore, ai u përjashtua nga radhët e Policisë së Shtetit, pa dhënë dorëheqje vullnetare.
Ngjarja tragjike ndodhi rreth orës 14:35, ndërsa Xhelo u gjet i djegur në sediljen e shoferit të automjetit të tij. Hetuesit kanë nisur punën për zbardhjen e plotë të rrethanave.
