Kanë dalë detaje të reja nga ngjarja e rëndë e ndodhur në Llogara në Vlorë, ku një person, i identifikuar si Artjol Xhelo, u gjet i vdekur brenda një makine që ishte shkrumbuar nga zjarri.
Mediat raportojnë se brenda automjetit nuk janë gjetur as armë dhe as gëzhoja, që mund të vërtetonin kryerjen e një vrasje. Pranë automjetit brenda të cilit ndodhej 32-vjeçari janë gjetur gjurmë benzine.
Sipas të njëjtave burime pista kryesore ku po heton policia është vetëvrasja. Raportohet se personi që humbi jetën është një ish-efektiv policie me origjinë nga Ura Vajgurore. Ai është larguar nga uniformat blu në vitin 2023 me dorëheqje. Dyshohet se ai e ka kryer aktin e vetëvrasjes në kushtet e depresionit.
Janë verifikuar kamerat e sigurisë në bizneset aty pranë dhe është konfirmuar se viktima ka qenë i vetëm kur ka hyrë në rrugën e Llogorasë. Dyshimet janë se ai ka spërkatur mjetin me benzinë dhe është futur brenda tij.
Efektivët kanë marrë në pyetje familjarë të viktimës pasi ende nuk është përjashtuar as pista e vrasjes. Është duke u verifikuar edhe shasia e automjetit tip BMW sepse targat janë shkrirë nga zjarri. ©LAPSI.al
