Orlando Bloom ka të qarta pritshmëritë e tij kur bëhet fjalë për marrëdhëniet romantike. Pas ndarjes nga Katy Perry, aktori ka folur hapur për atë që kërkon te një partnere e ardhshme.
Pas anulimit të fejesës në qershor dhe konfirmimit të ndarjes në korrik, aktori i “Pirates of the Caribbean”, 48 vjeç, u shfaq në një video të re në TikTok gjatë një bisede me krijuesin e faqes The People Gallery.
I pyetur nëse do të preferonte një partnere “me stil apo me para”, Bloom u përgjigj me të qeshur se do të donte “të dyja”. Në të njëjtën video, aktori dha edhe një mesazh motivues për këdo që po kalon një periudhë të vështirë në jetë.
“Merrni iniciativa, ngrihuni, krijoni rutinë, bëni diçka. Aktivizoni trupin, vazhdoni të krijoni,” tha ai.
Deklaratat e Bloom vijnë në një kohë kur Katy Perry është në qendër të vëmendjes për lidhjen e saj të re me ish-kryeministrin kanadez Justin Trudeau. Thashethemet për romancën e tyre nisën gjatë verës, kur u panë së bashku në Montreal, ndërsa në tetor ata u shfaqën publikisht si çift në Paris, gjatë festimit të ditëlindjes së këngëtares.
Në dhjetor, Perry e bëri lidhjen zyrtare në Instagram, duke publikuar foto dhe video nga udhëtimi i tyre në Japoni, ku ajo ishte në turneun “Lifetimes Tour”.
Sipas një burimi për People, Perry fillimisht nuk ishte në kërkim të një lidhjeje, por afrimi i vazhdueshëm i Trudeau e shndërroi miqësinë në diçka më serioze.
Nga ana tjetër, Bloom theu heshtjen për ndarjen nga Perry në shtator, duke deklaruar se ishte në një gjendje të mirë emocionale. Aktori dhe këngëtarja kanë së bashku një vajzë pesëvjeçare, Daisy.
“Kemi vajzën më të bukur në botë. Jam mirënjohës për gjithçka,” tha Bloom, duke shtuar se marrëdhënia mes tyre mbetet pozitive. “Do të jemi mirë. Vetëm dashuri,” përfundoi ai.
