Aktorja dhe komediania amerikane Amy Schumer dhe bashkëshorti i saj, Chris Fischer, po i japin fund martesës së tyre shtatëvjeçare, ndërsa burime pranë çiftit thonë se karriera e saj ka ndikuar ndjeshëm në përkeqësimin e marrëdhënies.
Sipas një burimi për Daily Mail, pas suksesit të madh të filmit “Trainwreck” në vitin 2015, Schumer ishte në kulmin e karrierës dhe mori shumë oferta për role, por përfundimisht refuzoi një pjesë të tyre.
Kur ajo solli në jetë djalin e tyre, Gene, në maj të vitit 2019, aktorja vendosi ta vendoste karrierën në plan të dytë. Megjithatë, burimi thekson se Schumer “nuk arriti të rikthehej me intensitetin që kishte dëshiruar”.
“Dhjetë vite pas suksesit të ‘Trainwreck’, ajo po përpiqet të rikthejë atë moment dhe të shohë nëse mund të ketë sërish një karrierë të madhe në filma,” tha burimi. “Me këto synime profesionale dhe duke qenë nënë, ajo nuk u fokusua mjaftueshëm në martesë. Në fund, ajo e kuptoi se nuk mund t’i ketë të gjitha, dhe ajo që vuajti më shumë ishte martesa.”
Burimi shtoi se ndarja ishte “e pashmangshme” dhe se Schumer është njëkohësisht e trishtuar dhe e çliruar. Ajo pritet të bashkëprindërojë djalin me Fischer, ndërsa fokusi i saj kryesor do të jetë rikthimi i karrierës, me synime ambicioze për vitin 2026.
Të premten, Schumer e konfirmoi ndarjen përmes një postimi në Instagram.
“Chris dhe unë kemi marrë vendimin e vështirë për t’i dhënë fund martesës sonë pas 7 vitesh. Ne e duam shumë njëri-tjetrin dhe do të vazhdojmë të fokusohemi në rritjen e djalit tonë,” shkroi ajo.
Përpara njoftimit zyrtar, aktorja kishte tërhequr vëmendje me humbjen e konsiderueshme në peshë dhe u shfaq pa unazën e martesës në disa postime në rrjetet sociale.
Ajo kishte reaguar gjithashtu ndaj thashethemeve për ndarje në një video të fshirë më vonë, ku sqaroi se vendimi nuk kishte lidhje as me ndryshimet fizike dhe as me diagnozën e autizmit të Fischer.
“Çfarëdo që të ndodhë mes meje dhe Chris-it nuk ka lidhje me humbjen në peshë apo me autizmin,” deklaroi Schumer.
