Angelina Jolie ka zbuluar për herë të parë shenjat e mastektomisë së dyfishtë, më shumë se një dekadë pasi iu nënshtrua ndërhyrjes parandaluese.
Aktorja 50-vjeçare pozoi për kopertinën e Time France, ku shfaqet me një bluzë të zezë të hapur, duke mbuluar pjesërisht gjoksin me dorë dhe duke nxjerrë në pah shenjën e operacionit.
“I ndaj këto plagë me shumë gra që i dua,” u shpreh fituesja e Oscar-it në një intervistë për revistën, të publikuar të hënën. “Gjithmonë prekem kur shoh gra të tjera që i ndajnë historitë e tyre.”
Jolie tha se vendosi të pozonte në këtë mënyrë për t’u bashkuar me gratë që flasin hapur për shëndetin e gjirit, duke theksuar se Time France po ndan informacione të rëndësishme për parandalimin dhe ndërgjegjësimin ndaj kancerit të gjirit.
Aktorja iu nënshtrua mastektomisë parandaluese në vitin 2013, pasi nëna e saj, Marcheline Bertrand, humbi jetën nga kanceri i gjirit dhe ai i vezoreve. Jolie kishte rezultuar pozitive për mutacionin e gjenit BRCA1, i cili rrit ndjeshëm rrezikun për zhvillimin e këtyre sëmundjeve.
Në një ese të publikuar në The New York Times asokohe, Jolie kishte shpjeguar se vendimi nuk ishte i lehtë, por se nuk është penduar kurrë.
“Rreziku im për kancer gjiri ra nga 87 për qind në më pak se 5 për qind,” kishte shkruar ajo. “Mund t’u them fëmijëve të mi se nuk kanë pse të kenë frikë se do të më humbasin nga kjo sëmundje.”
