Një aksident rrugor ka ndodhur në aksin Qafë Plloçë–Qukës. Dy makina janë përplasur me njëra-tjetrën, ku si pasojë janë plagosur dy persona. Aktualisht dy të lënduarat po marrin mjekim në spitalin e Elbasanit dhe ndodhen jashtë rrezikut për jetën.
Policia ka arrestuar njërin nga drejtuesit e automjeteve. Mbi 33-vjeçarin, banues në Pogradec, rëndon akuza për veprën penale“Shkelja e rregullave të qarkullimit rrugor”.
Njoftimi i policisë:
Shërbimet e Sektorit të Qarkullimit Rrugor arrestuan në flagrancë, për veprën penale “Shkelja e rregullave të qarkullimit rrugor”, shtetasin D. Xh., 33 vjeç, banues në fshatin Selcë e Poshtme, Pogradec.
Në aksin rrugor “Qafë Plloçë–Qukës”, ditën e djeshme, në afërsi të fshatit Vërri, duke drejtuar automjetin tip “Benz”, është përplasur me një automjet tjetër, me drejtues shtetasin A. K., 25 vjeç, banues në Korçë.
Si pasojë, janë dëmtuar shtetaset I. S., 45 vjeçe dhe E. M., 24 vjeçe, banuese në Korçë, pasagjere në automjetin me drejtues shtetasin A. K., të cilat po marrin mjekim në spitalin e Elbasanit dhe ndodhen jashtë rrezikut për jetën.
