Në ndeshjen e madhe të javës së 16-të të Serie A, Juventus mposhti Romën 2-1 me golat e Openda e Conceição dhe shkoi në -1 nga vendi i katërt, i cili mbahet pikërisht nga verdhekuqtë. Juventus rikthehet me forcë në garën për Champions League, ndërsa verdhekuqtë humbën mundësinë për t’u hedhur në krye të tabelës, në pritje të ndeshjeve të prapambetura të skuadrave që janë përpara në renditje (të angazhuara në Riad për Superkupën).
Pjesa e parë në “Allianz Stadium” u ndez vetëm në fund, kur Conceição fillimisht i shkoi pranë golit në minutën e 43’(pritje e shkëlqyer e Svilar) dhe më pas e gjeti menjëherë pas kësaj me një diagonale të saktë. Shumë më argëtuese pjesa e dytë, e nisur fuqishëm nga vendasit që e sulmuan Romën dhe gjetën golin e dytë në minutën e 70’ me golin e parë në Serie A të Openda: në krosimin e Zhegrovës Svilar priti goditjen me kokë të McKennie, amerikani rikuperoi topin e kthyer dhe i shërbeu belgut, i cili nuk gaboi me portën bosh. Në minutën e 75’ Baldanzi ngushtoi diferencën, duke mbërritur i pari te topi i kthyer pas pritjes së Di Gregorios, i cili ishte i zoti të ndalonte Ferguson. Kryeqytetasit provuan në çdo mënyrë, por rrezikuan shumë në minutën e 80’, kur shtylla i mohoi Yildiz gëzimin e golit.
LAZIO – CREMONESE 0-0
Java e 16-të e Serie A sjell një barazim mes Lazio dhe Cremonese. Bardhekaltërit e teknikut Maurizio Sarri dhe skuadra e drejtuar nga Davide Nicola largohen me një 0-0 të zbehtë nga “Stadio Olimpico” i Romës, ku asnjëra nga dy skuadrat nuk dhuroi emocione të veçanta. Mungesat e shumta i kushtëzojnë vendasit, ndërsa mysafirët zhvilluan një ndeshje të rregullt, por nuk gjetën shkëndijën vendimtare dhe e mbyllën takimin me dhjetë lojtarë: Ceccherini u përjashtua në minutën e 94’.
