Në Ditën e Krishtlindjeve, mbi 3 mijë fluturime munguan në qiellin evropian. Jo për shkak të ndonjë pengese - moti i keq, grevat apo ndonjë gjëje tjetër - por sepse Ryanair, linja ajrore më e madhe e kontinentit dhe e katërta më e madhe në botë sa i përket trafikut, mbylli gjithçka më 25 dhjetor. Asnjë avion i saj “Boeing” apo “Airbus” nuk u ngrit për një afat prej 36 orësh.
Arsyeja është kulturore. Ryanair ka selinë e saj pak jashtë Dublinit. Krishtlindjet, në një vend katolik si Irlanda, janë një festë e rëndësishme. Pra, pilotët, asistentët e fluturimit, stafi tokësor dhe stafi administrativ qëndrojnë në shtëpi. Askush nuk shfaqet në aeroport ose në zyrat e tyre.
Më 24 dhjetor 2025, Ryanair nxori në shitje 1 720 fluturime. Fluturimi i fundit që u nis, në prag të Krishtlindjeve, ishte në orën 6:30 pasdite (7:30 pasdite në Shqipëri): FR5307 nga Kerry në Dublin, një udhëtim prej 31-minutësh. Më 26 dhjetor, kompania rifillon me 2 658 nisje të planifikuara. Nisja e parë? Në orën 6:00 të mëngjesit me fluturimin FR8866 nga Sofje në Bergamo.
Ryanair që përfshin gjithashtu Malta Air, Buzz dhe Lauda Europe përpunon mbi 500 000 pasagjerë dhe ka afërsisht 40 milionë euro të ardhura. Edhe Jet2.com, një linjë ajrore britanike shumë e fokusuar në destinacionet turistike nuk kreu fluturme më 25 dhjetor. Por ajo ka 10 herë më pak lëvizje se Ryanair. Një linjë ajrore irlandeze, Aer Lingus, gjithashtu nuk fluturon. Vetëm disa fluturime që nisen nga SHBA-ja pasditen e Krishtlindjeve vijnë në Evropë vonë në mbrëmje.
Ka edhe transportues të tjerë që për arsye fetare, nuk fluturojnë për disa orë çdo javë. Ky është rasti me linjat ajrore izraelite, si “El Al”, fluturimi i fundit i të cilave niset të premten rreth drekës dhe më pas rifillon rreth orës 8 të mbrëmjes të shtunën. Në këtë afat është Shabati, dita e pushimit hebraik. ©LAPSI.al
