Policia e Shtetit është në ditët e saj më të zeza, ku zyrtarë të lartë të saj dalin herë pas here të lidhur me krimin e organizuar. Madje në disa kontrolle të fundit nëpër biznese e zyrtarë lidhur me dosjen "Balluku", Byroja Kombëtare e Hetimit dhe SPAK e kishin përjashtuar fare Policinë e Shtetit.
Por ndërkohë kreu i kësaj organizate, Ilir Proda, për të cilin ka gjithashtu një mal me akuza për lidhje me krimin, ka gjetur kohë të dekorojë një inspektor policie i cili gjatë protestës së opozitës, shpëtoi një qytetar nga djegia me molotov.
Certifikata e dhënë ndaj inspektorit Marsel Bizja mban motivacionin: “Në shenjë vlerësimi dhe mirënjohjeje për aktin e humanizmit dhe profesionalizmit të treguar gjatë ushtrimit të detyrës, ku me ndërhyrje të menjëhershme dhe vendimtare shpëtoi jetën e një qytetari, duke vënë në plan të parë mbrojtjen e jetës njerëzore, si një nga vlerat më të larta dhe misioni kryesor i Policisë së Shtetit”.
Certifikata iu dorëzua nga vetë Proda gjatë festës së fundvitit të Drejtorisë Vendore të Policisë Tiranë.
“Ju falënderoj për veprimin tuaj, pasi ky veprim dëshmoi edhe një herë humanizmin dhe vendosmërinë e Policisë së Shtetit për të mbrojtur jetën e qytetarëve. Vijoni me përkushtim të përmbushni me nder këtë mision, sa të vështirë, po aq edhe fisnik”, u shpreh Proda.
Sikur të kishim një polici kaq të zellshme për të luftuar krimin sic është edhe për të dhënë e marrë dekorata, ndryshe do të kishin qenë punët në Shqipëri. Por për fat të keq nuk e kemi!
©LAPSI.al
