Michael J. Fox po bën rikthimin e tij në aktrim pas pesë vitesh mungesë. Aktori 64-vjeçar, i njohur për rolin në “Spin City” dhe që prej vitesh po përballet me sëmundjen e Parkinsonit, shfaqet në trailerin e ri të sezonit të tretë të serialit hit të Apple TV+, “Shrinking”.
Në pamjet e publikuara, personazhi i Fox ndodhet në sallën e pritjes së një klinike dhe zhvillon një bisedë me personazhin e Harrison Ford, Dr. Paul Rhoades, i cili gjithashtu vuan nga Parkinsoni.
“Për çfarë ke ardhur?” e pyet Fox personazhin e Ford. “Parkinson,” përgjigjet Paul, ndërsa dora i dridhet. “Unë thjesht për një prerje flokësh,” ia kthen Fox me humor.
Në sezonin e ri rikthehen edhe aktorët kryesorë të serialit, përfshirë Jason Segel, Jessica Williams, Luke Tennie, Michael Urie, Lukita Maxwell, Christa Miller dhe Ted McGinley, si dhe disa yje të ftuar.
Seriali “Shrinking” tregon historinë e një terapisti (Jason Segel) që po përballet me humbjen e bashkëshortes së tij. Projekti është krijuar nga Segel, Brett Goldstein dhe Bill Lawrence.
Michael J. Fox do të shfaqet si personazh i ftuar, duke luajtur një pacient me Parkinson, rol që e ribashkon atë me Bill Lawrence, krijuesin e “Spin City”. Lawrence e përshkroi rolin si të veçantë dhe jo moralizues, duke theksuar se Fox sjell të njëjtin humor therës që e ka karakterizuar gjithmonë.
Fox u diagnostikua me Parkinson në vitin 1991, në moshën 29-vjeçare. Para “Shrinking”, paraqitja e tij e fundit në televizion ishte në serialin “The Good Fight” në vitin 2020, vit në të cilin ai njoftoi edhe tërheqjen nga aktrimi.
Në një intervistë të fundit, Fox tregoi se ishte vetë ai që kontaktoi Bill Lawrence për të qenë pjesë e serialit. Ai theksoi se xhirimet ishin një përvojë pozitive dhe se për herë të parë nuk ndjeu presion për gjendjen e tij shëndetësore gjatë punës në set.
Nga ana e tij, Harrison Ford u shpreh se prania e aktorit në serial është “një burim i madh frymëzimi” dhe se bashkëpunimi i tyre i shërben një historie me domethënie të fortë.
