Izraeli po përgatitet për mundësinë e një përshkallëzimi të gjerë ushtarak në tre fronte njëkohësisht: Iranin, Libanin dhe Bregun Perëndimor, raportoi Channel 12 në Izrael, duke cituar burime nga siguria dhe qeveria.
Sipas raportimit, ushtria izraelite po përshpejton përgatitjet për një skenar konflikti të papritur, veçanërisht në raport me Iranin, në një moment kur ky i fundit po përballet me protesta të mëdha antiqeveritare në disa qytete të vendit.
Kryeministri izraelit Benjamin Netanyahu, i cili ndodhet ende në Shtetet e Bashkuara, ka zhvilluar diskutime lidhur me mundësinë e sulmeve të reja ndaj Iranit.
Megjithatë, zyra e tij ka refuzuar të komentojë publikisht zhvillimet e fundit në Iran, nga frika se deklarata të tilla mund të shtyjnë Teheranin të ndërmarrë veprime kundër Izraelit për të zhvendosur vëmendjen nga trazirat e brendshme.
Një zyrtar i lartë izraelit u shpreh për Channel 12 se autoritetet po ndjekin nga afër situatën në Iran.
“Po monitorojmë një zhvillim të brendshëm dramatik në Iran dhe është ende herët për të kuptuar pasojat që mund të ketë”, tha ai.
Protestat në Iran, të cilat besohet se janë më të mëdhatë që nga viti 2022, janë nxitur nga inflacioni i lartë dhe përkeqësimi i situatës ekonomike.
Të mërkurën në mbrëmje, mediat iraniane raportuan se një anëtar i milicisë Basij, e lidhur me Gardën Revolucionare, u vra gjatë protestave në provincën perëndimore të Lorestanit.
Sipas Channel 12, udhëheqësit ushtarakë izraelitë po shqyrtojnë gjithashtu rrezikun e një përshkallëzimi paralel në kufirin verior me Libanin, ku vepron Hezbollah, si dhe në Bregun Perëndimor të pushtuar, ku tensionet janë rritur muajt e fundit.
