Nicole Kidman po hyn në vitin e ri me një frymë të re dhe një fokus të qartë te familja.
Aktorja 58-vjeçare ka ndarë me ndjekësit e saj një moment emocional nga festa e Vitit të Ri, ku shfaqet përkrah dy vajzave të saj, Sunday Rose (17) dhe Faith Margaret (14), duke parë fishekzjarrët të përqafuara.
Në një foto të publikuar në Instagram Story, Kidman shkroi: “Duke parë përpara drejt 2026-ës”, një mesazh i qartë për fillimin e një kapitulli të ri në jetën e saj.
Ky postim vjen disa muaj pasi u konfirmua divorci i saj nga bashkëshorti prej 19 vitesh, këngëtari Keith Urban. Çifti u nda zyrtarisht në shtator të vitit 2025, ndërsa burime pranë tyre kanë treguar se marrëdhënia kishte “mbërritur në fund”, pavarësisht përpjekjeve të Kidman për ta shpëtuar martesën.
Pas ndarjes, në media qarkulluan thashetheme për një romancë të mundshme mes Urban dhe kitaristes së tij Maggie Baugh, por këto u mohuan nga persona pranë artistes. As Urban dhe as Baugh nuk kanë reaguar publikisht për këto zëra.
Në një intervistë për Harper’s Bazaar në tetor 2025, fituesja e çmimit Oscar foli hapur për mënyrën se si përballet me momentet më të vështira të jetës.
“Edhe kur ndihesh i thyer, nëse ecën me kujdes dhe durim, dhimbja kalon,” u shpreh ajo, duke theksuar se çdo situatë, sado e rëndë, ka një rrugëdalje.
Sipas burimeve, Kidman është ende e trishtuar për ndarjen, por po ecën përpara dhe po i kushton gjithë vëmendjen vajzave të saj. Festat e fundvitit ajo i ka kaluar pranë familjes, fillimisht në SHBA dhe më pas në Australi, vendlindjen e saj.
“Pas një vjeshte të trazuar, gjithçka që ajo donte ishte të ishte në shtëpi dhe pranë njerëzve të saj,” ka treguar një burim për People.
Nicole Kidman duket e vendosur të lërë pas vitin e vështirë 2025 dhe të ndërtojë një të ardhme më të qetë, larg dramave personale.
