Greqia po përgatitet të marrë vendime kyçe gjatë vitit 2026 për ndërtimin e një sistemi të ri shumë-shtresor të mbrojtjes ajrore dhe raketore, të njohur si “Mburoja e Akilit”, një nga projektet më ambicioze të sigurisë në historinë e vendit.
Sipas raportimeve të Ekathimerini, Ministria greke e Mbrojtjes dhe drejtuesit e Forcave të Armatosura synojnë që brenda vitit të ardhshëm të përcaktojnë arkitekturën përfundimtare të këtij sistemi, i cili do të mbrojë vendin nga kërcënime moderne si raketat balistike, dronët, municionet endacake dhe sulmet ajrore hibride.
Barrën kryesore operacionale të sistemit pritet ta mbajë Ushtria Tokësore, e cila do të operojë shumicën e platformave të reja që do të përbëjnë bazën e “Mburojës së Akilit”.
Një element qendror i programit është blerja e 36 sistemeve raketore PULS nga Izraeli, kontrata për të cilat pritet të nënshkruhet deri në mesin e vitit 2026.
Këto sisteme do të rrisin ndjeshëm kapacitetet goditëse të ushtrisë greke, me municione që ofrojnë rreze veprimi deri në 300 kilometra.
Në thelb, mburoja do të mbështetet në sisteme izraelite të mbrojtjes ajrore dhe raketore, përfshirë Spyder (distanca e shkurtër), Barak MX (distanca e mesme) dhe David’s Sling (distanca e gjatë), duke krijuar një mbulim të plotë të hapësirës ajrore greke.
Kostoja totale e këtyre tre sistemeve pritet të tejkalojë 3 miliardë euro, ndërsa negociatat mund të zgjasin më shumë se një vit.
Athina ka vendosur si kusht minimal që industria greke e mbrojtjes të përfshihet të paktën me 25 për qind në projekt, një kërkesë që pala izraelite duket se është e gatshme ta pranojë.
Edhe pse sistemet kryesore të “Mburojës së Akilit” nuk pritet të jenë plotësisht funksionale para fundit të dekadës, viti 2026 konsiderohet vendimtar për drejtimin strategjik të mbrojtjes ajrore greke.
