Ervin Salianji ka folur për takimet që ka zhvilluar me demokratët në disa qytete. I ftuar në emisionin "Të Paekspozuarit" në MCN TV, Salianji deklaroi se në takimet e tij ka deri në 3 herë më shumë pjesëmarrës se në takimet e Berishës.
Salianji foli edhe për faktin që Ilir Alimehmeti nuk po e ndjek më nëpër "Foltore", por tha se Alimehmeti është i fokusuar në Tiranë dhe nuk ka patur shumë kohë.
"Alimehmeti ka qenë, u qëndron mendimeve të veta, por takimet do edhe kohë, edhe energji… Por ka axhendat e veta në Tiranë, sepse është në Këshill Bashkiak, jep mësim" - tha Salianji.
Gjithashtu ai foli edhe për akuzat e Berishës, se takimet e tij i organizon krimi, duke i konsideruar absurde dhe tha se ai ka bërë burg për shkak të denoncimeve ndaj krimit.
"Personi që akuzuan në Elbasan si koordinator të grupeve kriminale, doli iu përgjigj Sekretarit të Përgjithshëm të partisë dhe nxorri edhe foto me të. Nëse PD ka zgjedhur njerëz me krimin, problem i tyre. Të gjithë akuzat, bëhen për të shfokusuar vëmendjen. Elbasani, një javë para ishte takimi i kryetarit të partisë, kishte dy herë më pak njerëz. Si mund të thuash nga këto gjëra? Po tani çfarë thotë zotëria?
Po kolegë të tjerë në 2021, kë kanë akuzuar se mblidhnin firma për "Foltoret" e atëherëshme? Njëri tjetrin. Të më thuash mua, që kam bërë burg për denoncimin e krimit, që jam me krimin… Kishin çuar mesazhe në Korçë, çojnë në çdo qytet, dhe thonë takimet e tij i organizon krimi i organizuar, i çojnë këta nga qendra. Në Shkodër, thoshin e ka organizuar takimin Benet Beci, që këta e kishin drejtor. Zotëria u mor i pandehur para një jave, PD nuk mbajti qëndrim" - tha Salianji. /LAPSI.al
