Fermerët francezë sollën sot traktorët në rrugët e Parisit për herë të dytë brenda një jave, duke protestuar kundër marrëveshjes tregtare BE–Mercosur, për të cilën thonë se rrezikon seriozisht bujqësinë vendase duke krijuar konkurrencë të padrejtë nga importet më të lira të Amerikës së Jugut.
Fermerët në Francë – prodhuesja më e madhe bujqësore në Bashkimin Europian – si edhe në disa shtete të tjera anëtare, protestojnë prej muajsh kundër kësaj marrëveshjeje dhe për një sërë problemesh të tjera lokale. Demonstrata e sotme është organizuar nga FNSEA, një nga sindikatat më të mëdha të fermerëve në Francë.
“Marrëveshja u miratua pa u dëgjuar Parlamenti Europian”
“Marrëveshja Mercosur u miratua pa iu dhënë fjala Parlamentit Europian. Ajo do të çojë në importe të produkteve të huaja që ne mund t’i prodhojmë shumë mirë në Francë dhe që nuk respektojnë standardet strikte që zbatohen në bujqësinë franceze”, deklaroi Damien Greffet, nënkryetar i FNSEA dhe fermer në rajonin e Parisit.
Sipas tij, fermerët do të protestojnë sot para Parlamentit francez, ndërsa kanë planifikuar edhe një tjetër protestë më 20 janar para Parlamentit Europian në Strasburg.
Shtohet presioni ndaj qeverisë
Miratimi të premten i marrëveshjes me Mercosur nga shumica e vendeve anëtare të BE-së, pavarësisht kundërshtimit të Francës, ka shtuar presionin ndaj qeverisë franceze. Fermerët dhe partitë e opozitës, disa prej të cilave kanë paraqitur edhe mocione mosbesimi, e kanë ashpërsuar kritikën ndaj ekzekutivit.
Ndërkohë, një tjetër sindikatë fermerësh, Koordinimi Bujqësor, kishte sjellë traktorët javën e kaluar nën Kullën Eiffel dhe te Harku i Triumfit, në një protestë të befasishme që paralajmëron vazhdimin e mobilizimit.
