George Clooney nuk u përmbajt kur erdhi puna për të mbrojtur kolegët e tij Paul Dano, Owen Wilson dhe Matthew Lillard, pasi ata u kritikuan ashpër nga regjisori Quentin Tarantino muajin e kaluar.
“Meqë ra fjala, Paul Dano, Owen Wilson dhe Matthew Lillard – do të isha i nderuar të punoja me këta aktorë. I nderuar,” tha Clooney gjatë ndarjes së çmimeve AARP’s Movies for Grownups Awards, të shtunën.
Aktori i njohur, i cili fitoi çmimin Aktori më i mirë për filmin “Jay Kelly”, theksoi se filmi është realizuar nga njerëz që respektojnë aktorët.
“‘Jay Kelly’ është bërë nga njerëz që i duan aktorët – dhe kjo është shumë e rëndësishme. Janë njerëz që i njoh gjithë jetën time. Shumica janë aktorë. Kam një respekt të madh për ta dhe nuk më pëlqen të shoh njerëz që sillen me mizori,” u shpreh ai.
“Jetojmë në një kohë mizorie,” shtoi Clooney. “Nuk kemi pse ta shtojmë edhe më shumë.”
Clooney dhe Tarantino, 62 vjeç, kanë bashkëpunuar më parë në filmin e vitit 1996 “From Dusk Till Dawn”.
Në dhjetor, gjatë një interviste në “The Bret Easton Ellis Podcast”, Tarantino bëri komente të ashpra për disa aktorë të njohur të Hollivudit. Ai e quajti Paul Dano, 41 vjeç, “aktorin më të dobët në SAG”, duke thënë se filmi “There Will Be Blood” (2007) do të kishte qenë shumë më i mirë pa të.
“Austin Butler do të kishte qenë i mrekullueshëm në atë rol,” deklaroi Tarantino, duke e cilësuar Danon si “të dobët dhe jo interesant”.
Regjisori shtoi gjithashtu se nuk i pëlqen puna e Owen Wilson dhe Matthew Lillard.
Deklaratat e tij shkaktuan reagime të shumta në rrjetet sociale, ku fansat dolën në mbrojtje të Danos, duke e quajtur interpretimin e tij në “There Will Be Blood” një nga më të mirët e dekadës.
Ndërkohë, Matthew Lillard, 55 vjeç, reagoi për komentet e Tarantinos gjatë një eventi në Ohio.
“Quentin Tarantino tha këtë javë se nuk i pëlqen puna ime si aktor. Eh, kujt i intereson” tha fillimisht ai, por më pas pranoi se komentet e tilla të lëndojnë.
“Është e tmerrshme. Ai nuk do t’ia thoshte këtë Tom Cruise-it apo një ylli të madh të Hollivudit,” u shpreh Lillard.
