Vllaznia e ka nisur pjesën e dytë të kampionatit me një fitore të rëndësishme ndaj Egnatias. Kuqeblutë ndalën marshimin e kryesuesve dhe rikthehen fuqishëm në garën për vendin e parë. Fitorja e tretë radhazi mes kampionatit e Kupës për Martinin, që e sheh veten tani -4 nga kampionët në fuqi.
Ndeshja ishte e luftuar dhe me ritëm të lartë. Rastet nuk munguan në të dy portat. Diferencën e bëri një aksion spektakolar në pjesën e parë. Kallaku finalizoi saktë dhe kaloi Vllazninë në avantazh. Pas golit, shkodranët u mbrojtën me rregull. Egnatia provoi të barazonte. Rrogozhinasit krijuan disa raste të pastra. Portieri Pohls ishte vendimtar me pritjet e tij.
Sidoqoftë, pretendimet për një 11 metërsh të padhënë dhe goli i anuluar i Buric për një pozicion jashtë loje aktiv të Albanese kanë tërbuar teknikun Edlir Tetova: "Sa i përket lojës, mendoj se është penallti në pjesën e parë. Te rasti i Ruçit, nuk ka informacion për topin dhe çuditërisht nuk ka penallti. Dhe rasti i golit, nuk shihet në VAR. Nuk po them shumë larg trajektores, por është larg. Çuditërisht anulohet. Nuk e di pse janë këto situata ndaj nesh. Fundi është Vllaznia, Egnatia, duam të luajmë futboll. Si meriton Vllaznia, duam edhe ne situatat tona".
Kjo fitore i jep Vllaznisë moral dhe pikë të rëndësishme. Kuqeblutë kthehen sërish protagoniste në luftën për kreun e renditjes.
[video width="698" height="360" mp4="https://cdnimpuls.com/lapsi.al/wp-content/uploads/2026/01/6967c52bdd2a9.mp4"][/video]
