Dy punonjëse të postës së Bilishtit janë vënë nën hetim penal, pasi dyshohet se kanë përvetësuar për një periudhë disa mujore miliona lekë nga fondet e pensioneve dhe ndihmës ekonomike, përmes falsifikimit të dokumenteve dhe manipulimit të të dhënave financiare. Hetimi ka nisur pas verifikimeve të kryera nga Policia e Korçës, të cilat kanë nxjerrë në pah një skemë të dyshuar abuzimi me paratë e përfituesve, kryesisht pensionistë që jetonin jashtë vendit.
Më poshtë njoftimi i Policisë:
Specialistët e Seksionit për Hetimin e Krimeve Ekonomike dhe Financiare referuan materialet në Prokurori, ku filloi procedimi penal për veprat penale “Vjedhja e kryer duke shpërdoruar detyrën”, “Falsifikimi i dokumenteve” dhe “Falsifikimi kompjuterik”, kryer në bashkëpunim, për shtetaset:
P. Sh., 29 vjeçe, banuese në Bilisht, me detyrë përgjegjëse e zyrës postare Vishocicë, Devoll;
E. Ç., 27 vjeçe, banuese në Bilisht, me detyrë arkëtare-llogaritare, në degën postare Devoll.
“Nga hetimet dyshohet se këto shtetase, në bashkëpunim me njëra-tjetrën, gjatë periudhës shtator 2025 – janar 2026, kanë vjedhur rreth 22 000 000 lekë të rinj nga fondi i postës, duke shpërdoruar detyrat. Shtetasja P. Sh. dyshohet se ka përvetësuar dhe shpërdoruar fondet e pensioneve dhe të ndihmës ekonomike (kryesisht të pensionistëve që jetonin jashtë shtetit), duke falsifikuar nënshkrimet e tyre, ndërsa shtetasja E. Ç. dyshohet se ka manipuluar, hequr dhe falsifikuar mandatpagesat nga evidenca e librave të arkës dhe sistemit të menaxhimit të parave cash, për të favorizuar vjedhjen e fondeve nga 29-vjeçarja”, bëri me dije policia.
