Ashton Kutcher ka rrëfyer se gjatë ditëve të tij si model u pushua nga Gucci sepse u konsiderua “mbipeshë”.
Në një intervistë të re për Entertainment Tonight, aktori i “The Beauty” tregoi se kishte rezervuar një fushatë me shtëpinë luksoze të modës — e drejtuar në atë kohë nga Tom Ford — dhe kishte udhëtuar në Itali për sfilatën.
“Sapo mbërrita, më veshën me një Speedo rozë,” tha aktori i “That ’70s Show”, duke shtuar se në atë periudhë peshonte rreth 81 kg. Sipas tij, Ford kishte reaguar: “Ai është shumë i shëndoshë”, dhe më pas Kutcher u largua nga fushata.
Kutcher, tani 47 vjeç, tha se sot e kujton episodin me humor dhe se madje qesh për këtë me vetë dizajnerin. “I thashë: ‘Isha 81 kg! Për çfarë po flet?’”, rrëfeu ai.
Megjithatë, aktori e mbrojti vendimin e Ford-it, duke theksuar se dizajneri kishte një vizion të caktuar estetik. “Ai kishte diçka specifike që donte të shihte. Unë thjesht nuk isha i duhuri për atë moment,” u shpreh Kutcher.
Ai shtoi se bota e modelingut është e mbushur me pasiguri, edhe për “disa nga njerëzit më të bukur në botë”. “Të gjithë kanë një pasiguri. Nëse shikon mjaftueshëm gjatë në pasqyrë, do të gjesh diçka që nuk të pëlqen,” tha aktori.
