Lideri i Çeçenisë, Ramzan Kadyrov është i sëmurë prej disa kohësh dhe ndoshta edhe në prag të vdekjes, sipas disa burimeve. Djali i tij 18-vjeçar, një pasardhës i mundshëm, u përfshi në një aksident të rëndë me makinë dhe u transferua në Moskë në gjendje kritike. Kështu, Çeçenia po shkakton përsëri shqetësim serioz për Moskën sepse, nëse dinastia “Kadyrov” do të binte, republika islamike në Kaukaz mund të shndërrohet përsëri në një “fuçi baruti”.
Për vite me radhë, pas shpërbërjes së Bashkimit Sovjetik në vitin 1991, Çeçenia, e cila kërkoi pavarësi nga Rusia, ishte “një gjemb në këmbë” për Kremlinin. Pas dy luftërave që sollën mijëra vdekje dhe shkatërrime të mëdha nga viti 1994 deri në fillim të shekullit, Vladimir Putin i vendosi “të gjitha bastet” e tij mbi familjen Kadyrov.
Në fillim ishte Akhmat, një ish-udhëheqës i bandave separatiste, që u bë president i një republike islamike, i gatshëm për t'u bërë pjesë integrale e Federatës Ruse.
Më pas, pas vdekjes së tij në një sulm në vitin 2004, pushteti i kaloi djalit të tij Ramzan, i cili me metoda brutale e qetësoi plotësisht Çeçeninë dhe u dallua si shërbëtori më besnik i Putinit. Ramzan ka kohë që po mendon për pasardhësin e tij, duke u përqendruar në rritjen e fëmijëve të tij.
Adam, 18 vjeç është sigurisht ai tek i cili presidenti çeçen është mbështetur më së shumti. Pavarësisht moshës së tij të re, ai është sekretar i Këshillit të Sigurisë në Grozni, pasi ka shërbyer më parë edhe si kreu i rojës presidenciale. Ai gjithashtu mbikëqyr edhe Ministrinë e Brendshme.
Ende nuk është e qartë se çfarë ndodhi saktësisht në aksidentin ku ai u përfshi në kryeqytetin e vebdit, por gjendja e Adam u duk menjëherë kritike. Ai u dërgua në një spital në Grozni, ku u stabilizua dhe më pas u dërgua me aeroplan në Moskë.
Babai i tij, Ramzan 50-vjeçar thuhet se është gjithashtu në gjendje të rëndë, aq sa humbi një takim me Putin disa javë më parë. Ka raportime për mosfunksionim të veshkave, nekrozë pankreatike dhe simptoma pasuese pulmonare. Burime zyrtare, sigurisht, mohojnë gjithçka. Në Moskë, kanalet online të lidhur me ushtrinë, thuhet se janë urdhëruar të mos publikojnë lajme të mëtejshme rreth Kadyrov-ëve.
Ramzan Kadyrov ka edhe fëmijë të tjerë, por ata nuk duken të aftë të marrin përsipër frenat e vendit nëse babai i tyre do të ndërronte jetë. Më i madhi është Akhmat, 20 vjeç, i cili është zëvendëskryeministër, por duket se është përqendruar kryesisht në rolin e tij si Ministër i Kulturës Fizike dhe Sporteve. Zelimkhan, rreth 10 muaj më i madh se Adam, kryeson federatën e boksit. Pastaj janë 3 vajza, Khutmat, Aishat dhe Tabarik, të cilat kanë mbajtur gjithashtu role qeveritare (Aishat ishte Ministre e Kulturës), por që nuk mund të kenë ambicie për udhëheqje në një vend thellësisht islamik.
Për 23 vjet, Çeçenia ka qenë nën kontrollin e Kadyrov-ëve, të cilët kanë shtypur çdo zë kritik, e lëre më demokratik. Edhe klanet e ndryshme, të cilat më parë luftonin me njëra-tjetrën, nuk e kanë ngritur kokën për vite me radhë. Nën udhëheqjen e Ramzan, ish-guerilas kanë shkuar të luftojnë për Putinin në Ukrainë, megjithëse me sukses të kufizuar. Por nëse dinastia do të shpërbëhej papritur, “fitili i Kaukazit” mund të ringjallet në mënyrë dramatike. ©Përgatiti LAPSI.al
