Dy vëllezër shqiptarë, persona me precedentë penalë në Greqi, janë arrestuar si autorë të dyshuar të shpërthimit me eksploziv të një diskoteke në rrugën Michalakopoulou të Athinës, mbrëmjen e 7 tetorit 2025.
Sipas mediave në prangat e policisë greke ranë Blerim Buci, 41 vjeç dhe Besmir Buci, 32 vjeç, të dy nga Tirana. Veç akuzës për shpërthimin me eksploziv, ndaj tyre ishte aktiv një urdhër arresti për shkelje të kushteve kufizuese të qëndrimit, grabitje, si dhe shkelje të ligjeve mbi armët.
Mësohet se pasi parkoi një automjet pranë diskotekës, 32-vjeçari Besmir Buci, iu afrua objektit në këmbë dhe më pas vendosi e aktivizoi pajisjen shpërthyese të improvizuar. Më pas, ai hipi përsëri në automjet, ku 41-vjeçari Blerim Buci po e priste dhe u larguan së bashku.
Gjithashtu u zbulua se automjeti i përdorur nga autorët e aktit u ishte siguruar atyre nga bashkëpunëtori i tyre, një 44-vjeçar grek.
Gjatë kontrolleve të kryera, u gjetën dhe u sekuestruan, një thikë, 8 telefona celularë, një pajisje telekomandimi me ekran, 2 fletore me shënime, veshje të përdorura gjatë shpërthimit, si dhe automjeti që shërbeu si mjet për kryerjen e aktit.
“… Për bombën, më punësoi një çift që kishte hesape të vjetra, siç më thanë, me pronarin e dyqanit, dhe më dhanë 5,000 euro që të shkoja ta vendosja.”
Këto ishin të vetmet fjalë pranimi nga njëri prej dy burrave të arrestuar. Sipas hetimit të policisë, bomba ishte një “mesazh paralajmërues”. Autorët kërkuan para për ofrimin e mbrojtjes së paligjshme, por refuzimi kategorik i pronarit për t’iu nënshtruar shantazhit çoi në hakmarrje.
Gjatë operacionit, 41-vjeçari Blerim Buci, u gjet në një zonë të pazbuluar në natyrë, ku u përpoq të fshihej. Kur policia iu afrua dhe u përpoq ta ndalonte, ai bëri rezistencë, duke i goditur me duar dhe këmbë, por ata arritën ta ndalonin. Personat e arrestuar, të cilët janë akuzuar në të kaluarën, ndër të tjera, për – sipas rastit – vjedhje, grabitje, mashtrim, dëmtim të rrezikshëm trupor, falsifikim, si dhe shkelje të ligjeve për drogën, u dërguan në autoritetin kompetent të ndjekjes penale.
