Skemat e mashtrimit janë rikthyer sërish në qytetin e Lezhës. Një skemë, që mashtroi më herët qindra qytetarë, është rikthyer. Si duket, fakti që nuk u identifikuan përgjegjësit dhe askush nuk u vu përpara drejtësisë, la terren për rikthimin e këtij fenomeni. Kësaj radhe, skema më e re “Ivuu” funksionon serish nëpërmjet aplikacionit “Telegram”. Në grupin “Apex Albanian Group”, ku ndhodh mashtrimi bëjnë pjesë rreth 260 pjesëmarrës nga e gjithë Shqipëria.
E njëjta skemë ndodhi një vit më parë kur shumë qytetarë investuan shuma të konsiderueshme parash, me premtimin se brenda dy javësh do të përfitonin dyfishin e investimit. Kulmi i lojës “Xeux” u shënua gjatë verës së vitit 2025. Skema funksiononte në formë zinxhiri: çdo individ sillte persona të rinj dhe përfitonte komisione. Shumëfishimi i parave bëhej përmes të ashtuquajturave “sinjale”, që rrisnin buxhetin në një portofol elektronik, duke nxitur investime të tjera.
Për t’u bërë pjesë mjaftonte një investim prej 1–2 mijë eurosh, së bashku me kartën e identitetit, ndërsa komunikimi zhvillohej përmes aplikacionit “Telegram”. Si pasojë, shumë persona humbën shuma të mëdha parash, ndërsa dyshohet se përfituesit ishin vetë organizatorët e skemës. Kjo skemë duket se ka nisur sërish të qarkullojë në Lezhë, kërkohet reagim i menjëhershëm nga institucionet ligjzbatuese për të ndaluar përhapjen e saj.
