Një ndeshje futbolli amator në qytetin e Salamancës, në shtetin meksikan të Guanajuato, u shndërrua në një masakër kur persona të armatosur hapën zjarr ndaj spektatorëve, duke vrarë të paktën 11 persona dhe duke plagosur 12 të tjerë. Kjo zonë është një nga më të prekurat nga krimi i organizuar në vend. Sipas mediave të huaja, sulmi ndodhi të dielën pasdite, afërsisht në orën 5:20 pasdite ndërsa një ndeshje futbolli po luhej në stadiumet Campos de las Cabañas, në lagjen Loma de Flores.
Sipas autoriteteve, persona të armatosur mbërritën në vendngjarje me dy automjete bujqësore. Katër prej tyre dolën dhe filluan të qëllonin pa dallim ndaj të pranishmëve, midis të cilëve kishte gra dhe fëmijë. Të shtënat zgjatën për disa minuta dhe u dëgjuan deri në qytetin e Irapuato-s, rreth 15 kilometra larg.
Skena që panë ekipet e shpëtimit ishte kaotike, me trupa në terren, të plagosur që kërkonin ndihmë dhe të afërm që kërkonin të dashurit e tyre. Në vendngjarje u gjetën rreth 100 gëzhoja. Paramedikët konfirmuan se 10 persona u vranë menjëherë, ndërsa një viktimë tjetër ndërroi jetë nga plagët e marra gjatë transportimit në spital. Të paktën 12 persona u plagosën, disa prej të cilëve u shtruan në spital në gjendje të rëndë.
Operacion pa arrestime deri më tani
Forca nga Ushtria Meksikane, Garda Kombëtare, Policia e Shtetit dhe Policia Bashkiake e Salamankës nxituan në vendngjarje. Pavarësisht një operacioni të gjerë në zonë, autorët e krimit u arratisën dhe ende nuk janë identifikuar. Autoritetet njoftuan se po zhvillohet një hetim për të identifikuar personat përgjegjës dhe për të sqaruar motivet e sulmit, të cilat mbeten të panjohura.
