Victoria Beckham është shprehur “jashtëzakonisht mirënjohëse” pasi u nderua me një çmim prestigjioz mode në Paris.
Të martën, më 27 janar, stilistja 51-vjeçare ndau në Instagram disa foto nga ceremonia, ku u shfaq e shoqëruar nga bashkëshorti i saj, David Beckham, si dhe fëmijët Romeo (23), Cruz (20) dhe Harper (14). Victoria u nderua me titullin Kalorëse e Urdhrit të Arteve dhe Letërsisë, një dekoratë e dhënë nga Ministria Franceze e Kulturës.
“Nuk mund të jem më mirënjohëse. Merci xxx,” shkroi ajo krahas fotove nga ceremonia, e cila u mbajt një ditë më parë në Ministrinë e Kulturës në Paris.
Në njërën nga fotot, Victoria shihet pranë David Beckham, 50 vjeç, ndërsa në një tjetër ajo e shikon me dashuri bashkëshortin e saj. Çifti u fotografua gjithashtu me djemtë Romeo dhe Cruz, si dhe me partneret e tyre, Kim Turnbull dhe Jackie Apostel.
Në ceremoni ishin të pranishëm edhe emra të njohur si Helena Christensen, Tana Ramsay, Demi Moore, Anna Wintour, Edward Enninful dhe stilisti Haider Ackermann.
Edhe David Beckham reagoi në Instagram, duke shprehur krenarinë për bashkëshorten e tij:
“Jemi shumë krenarë për ty dhe për gjithçka ke arritur. Të emërohesh Kalorëse e Urdhrit të Arteve dhe Letërsisë nga Ministria Franceze e Kulturës… askush nuk e meriton më shumë se ti. Të duam.”
Një ditë më parë, Victoria kishte shkruar se ndihej “e nderuar” për këtë vlerësim, duke theksuar admirimin e saj për estetikën franceze dhe mënyrën se si Franca e trajton modën si art.
Paraqitja e Victorias dhe Davidit me fëmijët në Paris shënoi daljen e tyre të parë publike familjare pas deklaratave të bujshme të djalit të tyre të madh, Brooklyn Beckham, i cili së fundmi foli hapur për përçarjen me prindërit dhe familjen.
Në një seri postimesh në Instagram, Brooklyn pretendoi se ishte ndjerë i kontrolluar nga prindërit dhe se largimi nga familja i kishte sjellë qetësi emocionale. Ai mohoi gjithashtu akuzat se bashkëshortja e tij, Nicola Peltz, kishte ndikuar negativisht në marrëdhëniet familjare.
