Një rrjedhje disamujore e propanit në ambientet e fabrikës së industrisë ushqimore “Violanta”, e cila nuk u vu re në kohë, çoi përfundimisht në shpërthimin vdekjeprurës që mori jetën e pesë personave në orët e para të mëngjesit të së hënës.
Siç shpjegoi komandanti i ESKEDIK të Shërbimit Zjarrfikës, gjeneral brigade Anastasios Michalopoulos, zhvillimi i ngjarjes ishte si më poshtë: “Në kuadër të hetimit teknik u konstatuan dy depozita mbi tokë për propan, me kapacitet 5.000 dhe 9.000 litra përkatësisht, të cilat ndodheshin rreth 30 metra larg zonës së shpërthimit. Nga gjetjet rezultoi prania e akullit në tubacionet e depozitës prej 5.000 litrash, element që tregon përdorim të fundit të saj. Lidhja mes depozitave realizohej përmes tubacioneve nëntokësore, të cilat kalonin nën një zonë të asfaltuar dhe hynin në katin përdhes të godinës, duke furnizuar furrat e prodhimit.”
Pas kontrolleve të specializuara me përdorimin e azotit, u konstatua rrjedhje në tokë, çka çoi në hapjen e një prerjeje dhe gërmimi në thellësi rreth 60 centimetra, ku u zbulua një rrjedhje e konsiderueshme brenda dheut. Vlerësohet se rrjedhja ka qenë disamujore, ndërsa pajisjet matëse regjistruan përqendrime jashtëzakonisht të larta propani.
Sasia e madhe e propanit që kishte depërtuar përmes tokës u zhvendos në një distancë rreth 25 metrash dhe u grumbullua në një hapësirë nëntokësore, ku, në prani të një shkëndije të shkaktuar nga pajisje elektromekanike të objektit, ndodhi shpërthimi.
Aktivizimi i zjarrfikëses dhe operacioni emergjent
Informimi zyrtar nisi me mënyrën se si u mobilizua Shërbimi Zjarrfikës në orët kritike pas shpërthimit dhe zjarrit. Sipas gjeneralit Michalopoulos, “në orët e para të mëngjesit të 26 janarit 2026 shpërtheu zjarr në një fabrikë të industrisë ushqimore me emrin ‘Violanta’, e vendosur në Njësinë Rajonale të Trikalas”.
Shërbimi Zjarrfikës i Trikalas u njoftua në orën 03:56, ndërsa mjeti i parë zjarrfikës mbërriti në vendngjarje në orën 04:11. Për shuarjen e zjarrit u angazhuan gjithsej 13 mjete zjarrfikëse me ujë, 1 mjet me krah të lëvizshëm, 9 mjete ndihmëse, 2 ekipe të EMAK-ut (një nga Larisa dhe një nga Lamia), si dhe një ekip me dron. Në total morën pjesë 53 zjarrfikës.
Paralelisht u aktivizuan dy autobotë uji të Njësisë Rajonale të Trikalas, forca të Policisë Greke, si dhe ambulanca të shërbimit emergjent EKAV.
Në momentin e shpërthimit, fabrika ishte në funksion të plotë, pasi operon 24 orë në ditë. Në ambientet e saj ndodheshin 13 punonjës, 4 burra dhe 9 gra. Pas ngjarjes, 8 persona dolën nga fabrika. Tre prej tyre u transportuan me ambulanca të EKAV-it, tre të tjerë me mjete private në Spitalin e Përgjithshëm të Trikalas, ndërsa dy u kthyen në banesat e tyre.
Gjatë operacioneve për menaxhimin e situatës u mblodh Organi Lokal i Koordinimit, me pjesëmarrjen e drejtuesve të zjarrfikëses lokale dhe rajonale. U njoftuan menjëherë autoritetet hetimore dhe Shërbimi i Mjekësisë Ligjore i Larisës.
Që nga momenti i shpërthimit, paralelisht me shuarjen e zjarrit, forcat e zjarrfikëses kryen të gjitha veprimet e nevojshme për gjetjen e pesë punonjëseve të tjera. Rreth orës 07:55 u gjetën dy trupa të karbonizuar, në orën 08:10 u gjet trupi i tretë, rreth mesditës trupi i katërt, ndërsa më 27 janar 2026 u gjet edhe trupi i pestë.
Me urdhër të Shefit të Zjarrfikëses u aktivizua menjëherë Drejtoria për Hetimin e Krimeve të Zjarrit, me ekipe të specializuara hetimore. Brenda 12 orëve të para, hetimi u përforcua me ekipe shtesë nën drejtimin e kreut të drejtorisë, me qëllim hetimin e plotë dhe sigurimin e vendngjarjes.
Gjatë hetimeve u kryen ekspertiza të detajuara në terren, hartëzim i vendit të ngjarjes, mbledhje dhe analizë laboratorike e provave, marrje dëshmish nga punonjës dhe persona të përfshirë, si dhe vlerësim teknik i instalimeve kritike, për të dokumentuar plotësisht shkaqet dhe kushtet e shpërthimit.
Në vijim të hetimeve, më 27 janar 2026 u arrestuan tre shtetas grekë për veprime dhe mosveprime që lidhen me veprat penale të vrasjes nga pakujdesia, plagosjes së rëndë trupore në seri, zjarrvënies dhe shpërthimit, në ambientet e fabrikës në Njësinë Bashkiake Megala Kalivia të Bashkisë Trikala. Të arrestuarit u paraqitën sot para Prokurores kompetente të Trikalas.
Të gjitha procedurat hetimore për përfundimin e ekspertizës dhe hartimin e raportit teknik përfundimtar mbi shkaqet dhe rrethanat e ngjarjes, si dhe procedura paraprake penale, janë ende në zhvillim.
