Rreth orës 14:00 të ditës së sotme, baza materiale dhe dosjet e Kadastrës së Vlorës kanë nisur të transportohen drejt Tiranës për veprime të mëtejshme. Procesi po zhvillohet nën masa të rrepta sigurie, ndërsa materialet po ngarkohen në një kamion, të shoqëruar nga forcat e Policisë së Shtetit, raporton Syri tv.
Burime bëjnë me dije se dosjet përkatëse do të administrohen nga autoritetet kompetente në Tiranë, në kuadër të procedurave të mëtejshme hetimore dhe verifikuese.
Hipotekës së Vlorës iu vu dryni pak ditë më parë, pas vendimit për transferimin në Tiranë, duke nxitur protestën dhe pezullimin e punës nga punonjësit.
Agjencia Shtetërore e Kadastrës ka reaguar lidhur me zhvendosjen e këtij institucioni nga Vlora duke thënë se procesi i transferimit të drejtorive vendore në Tiranë ka nisur që nën vitin 2021 dhe se ky riorganizim synon përshpejtimin e trajtimit dhe unifikimin e praktikave të punës.
“Prej kohësh, proceset kadastrale për disa drejtori vendore janë të lokalizuara në Tiranë, si pjesë e një modeli organizimi që synon optimizimin e burimeve njerëzore dhe proceseve administrative.
Aplikimet për të gjitha proceset kadastrale kryhen online përmes portalit e-Albania dhe shërbimet përkatëse ofrohen gjithashtu në mënyrë elektronike, drejtpërdrejt në profilin e qytetarit aplikues.
Gjithashtu, dokumentacioni i nevojshëm për trajtimin e aplikimit, përveç ngarkimit në sistemin elektronik, dërgohet edhe përmes Postës Shqiptare pranë drejtorisë vendore, pavarësisht vendndodhjes së saj, për t’u administruar dhe bashkëlidhur me aplikimin e kryer në mënyrë të rregullt dhe të standardizuar.
Procesi i transferimit të drejtorive vendore në Tiranë ka nisur që nën vitin 2021 me transferimin e Durrësit e Krujës, për të vijuar më tej edhe me drejtori të tjera si Shkodër, Kavajë, Kamëz -Vorë, dhe Vlorë.
Në kuadër të rritjes së efikasitetit dhe të mirëadministrimit të proceseve të parashikuara nga legjislacioni në fuqi, edhe pjesa e mbetur e punonjësve në qytetin e Vlorës, po zhvendoset në Tiranë. Ky riorganizim synon përshpejtimin e trajtimit dhe unifikimin e praktikave të punës”, thuhet në reagimin e ASHK.
