Zayn Malik ka nxitur reagime në rrjet pasi duket se ka hedhur një “thumb” ndaj ish-shokut të tij të grupit, Harry Styles, për çmimet e larta të biletave të turneut të ardhshëm “Together, Together”.
Gjatë një koncerti në Las Vegas të mërkurën, më 28 janar, Malik falënderoi publikun për praninë e tyre, duke shtuar me humor:
“Shpresoj që çmimet e biletave të mos kenë qenë shumë të larta."
Videoja nga koncerti u bë virale në TikTok dhe u interpretua nga fansat si një koment indirekt ndaj Styles, i cili së fundmi është përballur me kritika për çmimet e biletave të turneut të tij botëror.
Harry Styles, 31 vjeç, do të mbajë 50 koncerte në mbarë botën nga maji deri në dhjetor 2026. Në Londër, çmimet e biletave variojnë nga 44 paund (rreth 61 dollarë) deri në 466 paund (rreth 643 dollarë), sipas The Hollywood Reporter, gjë që ka shkaktuar reagime të forta nga fansat në rrjetet sociale.
“E dua Harry-n, por nuk mund të justifikoj shpenzimin e një rroge të tërë për dy bileta koncerti,” shkroi një fans në platformën X. Të tjerë e kanë cilësuar situatën “të papranueshme” dhe kanë kërkuar ndryshime në mënyrën e shitjes së biletave.
Turneu “Together, Together” shërben për promovimin e albumit të ri të Styles, “Kiss All the Time. Disco, Occasionally”, që pritet të publikohet më 6 mars. Këngëtari ka konfirmuar se do të dhurojë 1 paund nga çdo biletë e shitur për organizatën LIVE Trust, e cila mbështet ambientet muzikore lokale në Mbretërinë e Bashkuar.
Styles pritet gjithashtu të mbajë një rezidencë prej 30 koncertesh në Madison Square Garden në New York.
Harry Styles dhe Zayn Malik ishin pjesë e grupit One Direction nga viti 2010 deri në 2015, kur Malik u largua nga grupi. One Direction u shpërbë zyrtarisht në vitin 2016.
Megjithëse marrëdhënia mes tyre ka qenë shpesh objekt spekulimesh, çdo shenjë përçarjeje duket se u zbeh në nëntor 2024, kur anëtarët e mbetur të grupit u ribashkuan publikisht në funeralin e Liam Payne.
Payne ndërroi jetë në tetor 2024, në moshën 31-vjeçare, pas një rënieje tragjike nga ballkoni i një hoteli në Buenos Aires. Si Malik ashtu edhe Styles publikuan mesazhe prekëse pas ndarjes nga jeta të ish-shokut të tyre të grupit.
